पुणे : हवाई दलातील जवान असल्याचे भासवून अधिकृत गणवेश शिवण्याचा एका तरुणाचा प्रयत्न ऐनवेळी उघडकीस आला. मृत जवानाच्या नावाने तयार केलेले बनावट ओळखपत्र घेऊन तो गणवेश शिवण्यासाठी टेलरच्या दुकानात पोहोचला होता. मात्र, त्याच वेळी तेथे आलेल्या एका खऱ्या हवाई दलाच्या जवानामुळे त्याचे बिंग फुटले.
ही घटना 6 जुलै रोजी लोहगाव येथील गुरुद्वारा कॉलनीतील बालाजी टेलर्स येथे घडली. या प्रकरणी लोहगाव पोलिसांनी शुभम विलास अंबुरे (वय 26, रा. शिक्रापूर रस्ता, ता. शिरूर) याला अटक केली आहे.
मिळालेल्या माहितीनुसार, शुभम मूळचा बीड जिल्ह्यातील असून मागील 3 महिन्यांपासून शिक्रापूर परिसरातील एका सलूनमध्ये काम करत होता. त्याने 2022 मध्ये निधन झालेल्या हवाई दलातील जवान रजतकुमार मिश्रा यांच्या नावाचा वापर करून बनावट ओळखपत्र तयार केल्याचा आरोप आहे.
हे ओळखपत्र घेऊन शुभम बालाजी टेलर्समध्ये गेला आणि हवाई दलाचा गणवेश शिवण्याची ऑर्डर दिली. टेलर माप घेत असताना त्याच दुकानात हवाई दलाचे जवान ब्रिजेशकुमार मिश्रा आले. गणवेशासाठी दाखवलेले ओळखपत्र पाहून टेलरने ते ब्रिजेशकुमार यांना दाखवले.
ओळखपत्रावरील नाव पाहताच ब्रिजेशकुमार यांना संशय आला. संबंधित जवान रजतकुमार मिश्रा यांचे 2022 मध्ये निधन झाले असल्याचे त्यांच्या लक्षात आले. त्यानंतर त्यांनी अधिक चौकशी केली असता शुभमकडे असलेले ओळखपत्र बनावट असल्याचे स्पष्ट झाले.
ब्रिजेशकुमार यांनी तातडीने लोहगाव पोलिसांना माहिती दिली. पोलिसांनी दुकानात पोहोचून शुभम अंबुरे याला ताब्यात घेतले. त्याच्याकडून बनावट ओळखपत्रही जप्त करण्यात आले आहे.
या प्रकरणी हवाई दलातील जवान ब्रिजेशकुमार मिश्रा (वय 48) यांच्या तक्रारीवरून लोहगाव पोलीस ठाण्यात गुन्हा दाखल करण्यात आला आहे. आरोपीने बनावट ओळखपत्र तयार करण्यामागे नेमका काय उद्देश ठेवला होता, याचा तपास सहाय्यक पोलीस निरीक्षक संतोष शिंदे करत आहेत.
