दौंड, (पुणे) : रक्षाबंधनाचा सण साजरा करण्यासाठी नातलगांकडे आलेल्या तरुणांपैकी एका 18 वर्षीय तरुणाचा भीमा नदी पात्रात बुडून दुर्दैवी मृत्यू झाला. मासेमारी करताना पाण्याचा प्रवाह वाढल्याने नदीत वाहून गेलेल्या तरुणाचा मृतदेह तब्बल तीन दिवसांच्या शोधमोहिमेनंतर सोमवारी (ता. 31) भीमा नदी पात्रातील नवीन ब्रिजजवळील महादेव मंदिरासमोर आढळून आला.
राजकुमार फुलसिंग यादव (वय 18, सध्या रा. सारोळा रेल्वे स्टेशनजवळ, ता. जि. अहिल्यानगर; मूळ रा. चंद्राणी माळ, ता. समनापूर, जि. दिंडोरी, मध्य प्रदेश) असे पाण्यात बुडून मृत्यू झालेल्या दुर्दैवी तरुणाचे नाव आहे. याबाबत मुकेश कुमार दुर्वे (वय -18, व्यवसाय मजुरी सध्या राहणार दौंड रेल्वे स्टेशन बंगला साईट कडील पार्किंग जवळील मोकळ्या जागेत ताडपत्रीच्या झोपड्या मध्ये दौंड तालुका दौंड जिल्हा पुणे. मूळ राहणार चंद्रानी माळ तालुका समनापुर जिल्हा दिंडोरी राज्य मध्य प्रदेश) यांनी खबर दिली.
मिळालेल्या माहितीनुसार, २८ ऑगस्ट रोजी रक्षाबंधन सणानिमित्त अहिल्यानगर जिल्ह्यातील सारोळा येथून 13 जण दौंड रेल्वे स्टेशन परिसरातील ताडपत्रीच्या झोपड्यांमध्ये राहणाऱ्या आपल्या नातलगांकडे आले होते. सणाचा आनंद साजरा केल्यानंतर, 29 ऑगस्ट रोजी सकाळी 11 वाजेच्या सुमारास सर्वजण पानसरे वस्ती येथील भीमा नदीच्या किनाऱ्यावर आंघोळीसाठी व मासेमारीसाठी गेले होते. नदीत पोहत असताना राजकुमार यादव, रामा दुर्वे, कमलेश पट्टा आणि विजय दुर्वे हे चौघे जण नदीच्या मध्यभागी असलेल्या खडकावर जाऊन गळाने मासे पकडत होते.
मासेमारी सुरू असतानाच राजकुमार यादव याने खडकावरून अचानक नदीच्या पात्रात उडी मारली. मात्र, भीमा नदी पात्रात पाण्याचा प्रवाह प्रचंड असल्याने तो पाण्याच्या वेगासोबत वाहून जाऊ लागला. त्याला वाहून जाताना पाहून खडकावर असलेल्या विजय, कमलेश आणि रामा या तिघांनीही त्याला वाचवण्यासाठी तत्काळ नदीत उड्या घेतल्या.
मात्र, पाण्याचा वेग जास्त असल्याने ते तिघेही प्रवाहासोबत वाहून जाऊ लागले व त्यांनी मदतीसाठी आरडाओरडा सुरू केला. सुदैवाने, तेथे मासेमारी करणाऱ्या एका स्थानिक व्यक्तीने प्रसंगावधान राखून नदीत उडी घेतली आणि रामा, कमलेश व विजय या तिघांना सुखरूप बाहेर काढले. परंतु, राजकुमार यादव हा पाण्याच्या वेगात दृष्टीआड झाला. घटना घडताच नातेवाइकांनी डायल 112 वर पोलिसांना माहिती दिली.
दरम्यान, दौंड पोलीस, स्थानिक नागरिक आणि मच्छीमारांनी तातडीने शोधमोहीम सुरू केली. दौंड पोलीस ठाण्यात मिसिंग नोंद करून रेस्क्यू टीमच्या मदतीने नदी पात्रात शोध सुरू होता. अखेर सोमवारी (ता. 31) सकाळी अकरा वाजेच्या सुमारास भीमा नदी पात्रातील नवीन ब्रिजसमोरील महादेव मंदिराच्या मोकळ्या पात्रात राजकुमार याचा मृतदेह तरंगताना आढळून आला. पोलिसांनी मृतदेह ताब्यात घेऊन ओळख पटवली व दौंड उपजिल्हा रुग्णालयात पाठवून दिले. घटनेचा पुढील तपास पोलीस शिपाई लवटे करत आहेत.
