पुणे: पुण्यातील शिरूर तालुक्यातील एका 66 वर्षीय शेतकऱ्याने (Pune News) नफ्याच्या हव्यासापोटी चक्क कायद्याची मर्यादा ओलांडली. उसाच्या शेतात कोणालाही संशय येऊ नये अशा पद्धतीने ‘अफू’ची बेकायदेशीर लागवड करणाऱ्या काळूराम दशरथ थिटे या शेतकऱ्याला शिक्रापूर पोलिसांनी बेड्या ठोकल्या आहेत.
केंदूर येथील थिटेमळा भागात राहणाऱ्या काळूराम थिटे यांनी आपल्या उसाच्या शेतात आंतरपीक म्हणून अफूची झाडे लावली होती. ऊस उंच वाढत असल्याने त्या आडून केली जाणारी ही अंमली पदार्थांची शेती कोणाच्याही नजरेस पडणार नाही, असा त्यांचा बनाव होता. मात्र, शिक्रापूर पोलिसांच्या गुन्हे शाखेला या ‘गुप्त’ शेतीची पक्की माहिती मिळाली. स्थानिक गुन्हे अन्वेषण विभागाचे हवालदार जनार्दन शेळके यांनी याप्रकरणी फिर्याद दिली होती. पोलिसांनी जेव्हा शेतावर छापा टाकला, तेव्हा 230 झाडे पाहून अधिकारीही चक्रावून गेले.
छाप्यात पोलिसांनी 2 लाख 60 हजार रुपये किमतीची सुमारे 28 किलो वजनाची अफूची झाडे जप्त केली आहेत. अंमली पदार्थ विरोधी कायद्यानुसार अफूची लागवड करणे हा अजामीनपात्र गुन्हा असून यामागे एखादे मोठे रॅकेट सक्रिय आहे का, याचा तपास आता पोलीस उपनिरीक्षक सोमनाथ कचरे करत आहेत.
