लोणी काळभोर (पुणे), ता. 20 : भारतरत्न डॉ. बाबासाहेब आंबेडकर (Ambedkar Jayanti) यांच्या 135 व्या जयंतीनिमित्त कदमवाकवस्ती (ता. हवेली) येथे सामाजिक बांधिलकीचा अनोखा आदर्श घालत भव्य महाआरोग्य शिबीर व रक्तदान शिबिराचे दिमाखदार आयोजन करण्यात आले. या उपक्रमाला नागरिकांनी दिलेला उत्स्फूर्त प्रतिसाद पाहता परिसरात जणू आरोग्य सेवेचा महाउत्सवच साजरा झाल्याचे चित्र दिसून आले. (Ambedkar Jayanti)
शनिवारी (ता.18) सकाळी 9 ते सायंकाळी 5 या कालावधीत चाललेल्या या शिबिरात लहानांपासून ज्येष्ठांपर्यंत सर्व वयोगटातील नागरिकांनी मोठ्या संख्येने सहभाग घेतला. तज्ज्ञ डॉक्टरांच्या मार्गदर्शनाखाली विविध आजारांचे निदान करण्यात आले. विशेष म्हणजे, ग्रामीण भागात सहज उपलब्ध न होणाऱ्या अनेक आरोग्य सुविधांचा लाभ नागरिकांना एकाच छताखाली मिळाल्याने समाधान व्यक्त करण्यात आले. (Ambedkar Jayanti)
या महाआरोग्य शिबिरात वजन व उंची तपासणी, रक्तदाब (ब्लड प्रेशर), रक्तातील साखर (शुगर) तपासणी, महिलांसाठी हिमोग्लोबिन तपासणी, नेत्र तपासणी तसेच गरजेनुसार ईसीजी सुविधा देण्यात आली. प्रत्येक रुग्णाला तज्ज्ञ डॉक्टरांकडून सविस्तर सल्ला देण्यात आला. तपासणीनंतर गरजू रुग्णांना मोफत औषधांचेही वितरण करण्यात आले. या उपक्रमामुळे अनेक नागरिकांनी आपल्या आरोग्याबाबत जागरूक राहण्याचा संकल्प व्यक्त केला.
या कार्यक्रमाचे प्रमुख आकर्षण ठरलेल्या रक्तदान शिबिरात युवक-युवतींनी मोठ्या उत्साहात सहभाग घेतला. “रक्तदान हेच श्रेष्ठ दान” या संदेशाला प्रतिसाद देत अनेकांनी स्वेच्छेने रक्तदान केले. संघर्ष ग्रुप विश्वरत्न प्रतिष्ठान व समता प्रतिष्ठान यांच्या वतीने प्रत्येक रक्तदात्याचा सन्मान करून आकर्षक भेटवस्तू देण्यात आल्या. त्यामुळे रक्तदात्यांचा उत्साह द्विगुणित झाला. (Ambedkar Jayanti)
या सामाजिक उपक्रमाचे आयोजन ग्रामपंचायत सदस्य दीपक आढाळे यांच्या पुढाकारातून करण्यात आले. त्यांच्या या उपक्रमाचे सर्व स्तरांतून कौतुक होत असून, “आंबेडकर जयंती ही केवळ उत्सव नसून समाजसेवेची प्रेरणा आहे,” हा संदेश त्यांनी कृतीतून दिल्याची भावना नागरिकांनी व्यक्त केली. या कार्यक्रमाला पंचायत समिती सदस्य आमोल टेकाळे, माजी उपसरपंच गणेश कांबळे, रिपाईचे रमेश गायकवाड यांच्यासह संदीप निकाळजे, आतिश काकडे, आनंद बनसोडे, मगर उडाणशिव, काळूराम कुंजीर, माऊली गायकवाड आदी मान्यवर आणि ग्रामस्थ मोठ्या संख्येने उपस्थित होते. (Ambedkar Jayanti)
‘ऐतिहासिक क्षणाचे साक्षीदार व्हा’—आवाहनाला भरघोस प्रतिसाद
“ऐतिहासिक क्षणाचे साक्षीदार व्हा” या आयोजकांच्या आवाहनाला प्रतिसाद देत कदमवाकवस्ती व परिसरातील नागरिकांनी मोठ्या संख्येने उपस्थिती लावली. शिबिरात शिस्तबद्ध नियोजन, डॉक्टरांची उपलब्धता आणि स्वयंसेवकांची तत्पर सेवा यामुळे संपूर्ण कार्यक्रम यशस्वीरीत्या पार पडला. एकूणच, आंबेडकर जयंतीचे औचित्य साधत आयोजित करण्यात आलेल्या या उपक्रमाने समाजसेवेचा आदर्श घालून दिला असून, ग्रामीण भागात आरोग्य सेवेची नवी दिशा दाखवली आहे. (Ambedkar Jayanti)
