पुणे : कौटुंबिक वादातून स्वतःच्या मालकीच्या सदनिकेत प्रवेश करण्यास मज्जाव करण्यात आल्याचा आरोप करत एका व्यक्तीने आई आणि पत्नीविरुद्ध पोलिसांत तक्रार दाखल केली आहे. या प्रकरणी खराडी पोलिसांनी दोघींविरुद्ध गुन्हा नोंदवून तपास सुरू केला आहे.
अमरजितसिंग भूपेंद्र कपूर (वय 42, रा. पंचशील टॉवर, खराडी) यांनी याबाबत तक्रार दिली आहे. त्यानुसार त्यांच्या आई आणि पत्नीविरुद्ध गुन्हा दाखल करण्यात आला आहे. ही घटना 6 जून रोजी रात्री साडेआठच्या सुमारास घडल्याचे तक्रारीत नमूद करण्यात आले आहे.
पोलिसांनी दिलेल्या माहितीनुसार, कपूर यांनी 2022 मध्ये खराडी परिसरातील पंचशील टॉवरमध्ये सदनिका खरेदी केली होती. ते एका खासगी वित्तीय संस्थेत नोकरी करत होते. मात्र काही काळापूर्वी त्यांची नोकरी गेल्यानंतर गृहकर्जाचे हप्ते भरणे कठीण झाले. त्यामुळे सदनिका भाड्याने देऊन केसनंद येथे राहण्याचा प्रस्ताव त्यांनी कुटुंबीयांसमोर ठेवला होता.
दरम्यान, कपूर आणि त्यांच्या पत्नीमध्ये वैवाहिक वाद सुरू असून दोघांनीही कौटुंबिक न्यायालयात घटस्फोटासाठी अर्ज दाखल केला आहे. तसेच संबंधित सदनिका रिकामी करून देण्याबाबत कपूर यांनी न्यायालयात दाद मागितल्याचे समोर आले आहे. फिर्यादीच्या म्हणण्यानुसार, न्यायालयाने 15 मेपर्यंत सदनिका रिकामी करण्याचे आदेश दिले होते.
तक्रारीनुसार, 6 जून रोजी कपूर हे त्यांच्या सदनिकेत गेले असता त्यांना घरात प्रवेश करता आला नाही. सदनिकेवरील बायोमेट्रिक लॉक काढून त्याठिकाणी कडी-कोयंडा लावण्यात आल्याचे त्यांच्या निदर्शनास आले. तसेच आई आणि पत्नीने घरात प्रवेश करण्यास विरोध केल्याचा आरोप त्यांनी केला आहे.
या घटनेनंतर कपूर यांनी खराडी पोलीस ठाण्यात तक्रार दाखल केली. त्यानुसार पोलिसांनी गुन्हा नोंदवून प्रकरणाचा तपास सुरू केला आहे. दरम्यान, या प्रकरणात दोन्ही बाजूंचे म्हणणे आणि न्यायालयीन प्रक्रियेतील कागदपत्रांची पडताळणी केली जाणार असल्याचे पोलिसांकडून सांगण्यात आले.
