पुणे : देशातील शिक्षण व्यवस्थेशी संबंधित विविध प्रश्नांवरून केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत ‘कॉकरोच जनता पक्ष’ उद्या (11 जून) पुण्यात आंदोलन करणार आहे. सावित्रीबाई फुले पुणे विद्यापीठाच्या मुख्य प्रवेशद्वारासमोर हे आंदोलन आयोजित करण्यात आले असून विद्यापीठ प्रशासनाने आवश्यक अटी आणि शर्तींसह परवानगी दिली आहे.
आंदोलनादरम्यान कायदा व सुव्यवस्था अबाधित राहावी तसेच कोणताही अनुचित प्रकार घडू नये यासाठी विद्यापीठ प्रशासनाने आयोजकांना आवश्यक सूचना दिल्या आहेत.
कॉकरोच जनता पक्षाचे संस्थापक अभिजित दीपके यांनी सोशल मीडियाच्या माध्यमातून या आंदोलनाची घोषणा केली आहे. त्यांच्या माहितीनुसार, गुरुवारी दुपारी 4 वाजता विद्यापीठाच्या मुख्य प्रवेशद्वारासमोर आंदोलनाला सुरुवात होणार आहे. दिल्लीतील जंतर-मंतर येथे झालेल्या आंदोलनानंतर पक्षाचे हे दुसरे मोठे आंदोलन मानले जात आहे.
या आंदोलनात विद्यार्थी, तरुण व्यावसायिक आणि विविध क्षेत्रातील नागरिक सहभागी होण्याची शक्यता व्यक्त केली जात आहे. शिक्षण क्षेत्रातील प्रश्न, परीक्षा व्यवस्थेतील अडचणी आणि विद्यार्थ्यांच्या मागण्यांकडे केंद्र सरकारचे लक्ष वेधण्यासाठी हे आंदोलन करण्यात येत असल्याचे आयोजकांनी सांगितले आहे.
यापूर्वी 6 जून रोजी दिल्लीतील जंतर-मंतर येथे पक्षाने पहिले आंदोलन केले होते. या आंदोलनात देशातील विविध राज्यांतील विद्यार्थी आणि पालक सहभागी झाले होते. त्या वेळी शिक्षण सुधारक आणि सामाजिक कार्यकर्ते सोनम वांगचुक यांनीही आंदोलनाला पाठिंबा दर्शविला होता.
पुण्यातील आंदोलनातही वेगळ्या पद्धतीने निषेध नोंदविण्याची तयारी करण्यात आली आहे. आंदोलक कॉकरोचचे मुखवटे परिधान करून आणि हातात फुले घेऊन आंदोलनात सहभागी होणार असल्याचे सांगण्यात आले आहे. आंदोलन शांततेत पार पडावे यासाठी अभिजित दीपके यांनी कार्यकर्ते आणि विद्यार्थ्यांना संयम राखण्याचे आवाहन केले आहे. तसेच पोलिस आणि प्रशासनाशी पूर्ण सहकार्य करण्याच्या सूचनाही देण्यात आल्या आहेत.
दरम्यान, पुण्यातील या आंदोलनानंतर पक्षाच्या पुढील भूमिकेबाबत किंवा नव्या घोषणांबाबत अभिजित दीपके काय भूमिका मांडतात, याकडे विद्यार्थी आणि शैक्षणिक क्षेत्राचे लक्ष लागले आहे.
