Pune Crime : दौंड, ता. 14 : दौंड शहरात बेकायदेशीर जुगार अड्ड्यावर पोलिसांनी धडक कारवाई करत पाच जणांना रंगेहात पकडल्याने खळबळ उडाली आहे. ख्रिश्चन कॉलनी परिसरातील एका बंद घराच्या आडोशाला सुरू असलेल्या ‘रम्मी’ जुगारावर ही कारवाई 13 एप्रिल रोजी दुपारी दोन वाजण्याच्या सुमारास करण्यात आली आहे.
जॉन ऍन्थोनी फिलीफ (54), कमलेश सुरेश बेहरानी (52), विजय सुशील श्रीसुंदर (45), मॅन्युअल डरेल डीकोस्टा (45) आणि संजय भिमराव बारावकर (58) अशी अटक करण्यात आलेल्यांची नावे आहेत. याप्रकरणी स्थानिक गुन्हे शाखेचे पोलीस अंमलदार असिफ नबीलाल शेख यांनी दौंड पोलीस ठाण्यात फिर्याद दिली आहे. पोलिसांनी दिलेल्या माहितीनुसार, बंगलासाईट, ख्रिश्चन कॉलनी येथे हिरव्या नेटच्या आडोशात जुगार सुरू असल्याची माहिती पोलिसांना मिळाली होती.
मिळालेल्या माहितीच्या अनुषंगाने पोलिसांनी छापा टाकत पाच जणांना ताब्यात घेतले. हे सर्वजण पैशांवर ‘रम्मी’ हा जुगार खेळत असल्याचे निष्पन्न झाले. या कारवाईदरम्यान पोलिसांनी 8 हजार 760 रुपयांची रोख रक्कम जप्त केली आहे. या प्रकरणी दौंड पोलीस ठाण्यात मुंबई जुगार कायदा कलम 12(अ) अंतर्गत गुन्हा दाखल करण्यात आला आहे. पुढील तपास पोलीस हवालदार सय्यद करत आहेत.
