प्रतिनिधी : अमित मुंडीक
Pune Crime : तळेगाव दाभाडे : तळेगाव दाभाडे परिसरात सार्वजनिक ठिकाणी अश्लील वर्तन करून नागरिकांना अडथळा निर्माण केल्याप्रकरणी एका महिलेविरोधात गुन्हा दाखल करण्यात आला आहे. तळेगाव दाभाडे पोलीस स्टेशन येथे गुन्हा क्रमांक ५६/२०२६ अन्वये अनैतिक व्यापारास प्रतिबंध अधिनियम 1956 च्या कलम 8 अंतर्गत कारवाई करण्यात आली आहे.
दि. 23 फेब्रुवारी 2026 रोजी सायंकाळी सुमारे 5.55 वाजता जुना पुणे–मुंबई महामार्गावरील सीआरपीएफ गेट क्रमांक ३ समोरील वडाच्या झाडाखाली हा प्रकार घडल्याचे पोलिसांनी सांगितले. संबंधित महिलेने वेश्याव्यवसायाच्या उद्देशाने सार्वजनिक ठिकाणी लैंगिक हावभाव करत अश्लील शब्द उच्चारल्याची नोंद तक्रारीत करण्यात आली आहे. या प्रकारामुळे ये-जा करणाऱ्या नागरिकांना अडथळा निर्माण झाला तसेच सार्वजनिक शिष्टाचाराचा भंग झाल्याचे पोलिसांनी नमूद केले आहे. रात्री 8.36 वाजता याप्रकरणी अधिकृत गुन्हा दाखल करण्यात आला.
या प्रकरणी अनैतिक मानवी वाहतूक प्रतिबंध कक्ष, गुन्हे शाखा, पिंपरी-चिंचवड येथील पोलीस हवालदार उदयकुमार बाळासाहेब भोसले यांनी सरकारतर्फे फिर्याद दिली असून पुढील तपास पोलीस हवालदार तोडकर करत आहेत. संबंधित महिला आरोपीला अद्याप अटक करण्यात आलेली नाही. सार्वजनिक ठिकाणी शिस्त व सभ्यता राखावी, अन्यथा कठोर कारवाई केली जाईल, असा इशारा पोलिसांनी दिला आहे.
