Pune Crime : पुणे : पुणे ग्रामीण पोलिसांनी आर्थिक फसवणुकीच्या मोठ्या प्रकरणात कारवाई करत भाजपशी संबंधित माजी मंत्री शेखर चरेगावकर (Shekhar charegaonkar ) यांना अटक केली आहे. रिसॉर्ट व्यवस्थापनाच्या व्यवसायातून चांगला परतावा मिळवून देण्याचे आमिष दाखवून गुंतवणूकदारांची फसवणूक ( financial fraud case) केल्याचा आरोप त्यांच्यावर आहे. तसेच यशवंत सहकारी बँकेतून कोट्यवधी रुपयांचा अपहार केल्याचाही आरोप समोर आला आहे. या कारवाईमुळे राजकीय वर्तुळात खळबळ उडाली आहे.
या प्रकरणात चिखली नागरी सहकारी बँकेचे अध्यक्ष सतीश भगवानदार गुप्ता, संतोष पवार, वनिता पवार, श्रीपदा कुलकर्णी, रोहित लभडे, सुरेंद्र काळे आणि सुमित घोडके यांच्याविरोधातही भोर पोलीस ठाण्यात गुन्हा दाखल करण्यात आला आहे. प्रदीप रामचंद्र चोरघे यांनी न्यायालयात तक्रार दाखल केल्यानंतर कोर्टाच्या आदेशानुसार 5 मार्च 2024 रोजी गुन्हा नोंदवण्यात आला होता.
तक्रारीनुसार, गुंतवणूक योजनेअंतर्गत सुमारे 8 कोटी रुपयांचे कर्ज मंजूर करण्यात आले होते. मात्र त्यापैकी सुमारे 6.5 कोटी रुपयांचा अपहार झाल्याचा आरोप करण्यात आला आहे. पुणे ग्रामीण पोलिसांच्या आर्थिक गुन्हे शाखेने तपास करत चरेगावकर यांना अटक केली. या प्रकरणात न्यायालयाने त्यांना 3 दिवसांची पोलीस कोठडी सुनावली आहे.
दरम्यान, चरेगावकर यांच्यावर यापूर्वीही गंभीर आरोप झाले होते. मागील वर्षी कराड पोलिसांनी त्यांना अटक केली होती. त्यांच्यावर यशवंत बँकेत सुमारे 112 कोटी रुपयांचा गैरव्यवहार केल्याचा आरोप आहे. तसेच अंमलबजावणी संचालनालयानेही त्यांच्या विरोधात गुन्हा नोंदवला आहे.
या प्रकरणात महाराष्ट्र ठेवीदार हितसंरक्षण कायद्यानुसार कलमे लावण्यात आली असून संपूर्ण प्रकरणाचा सखोल तपास सुरू आहे. गुंतवणूकदारांचे पैसे परत मिळावेत आणि दोषींवर कठोर कारवाई व्हावी, अशी मागणी पुढे येत आहे.
