Ashok Kharat : स्वतःला ‘कॅप्टन’ म्हणवून घेणारा आणि बड्या राजकीय नेत्यांच्या वर्तुळात वावरणारा स्वयंघोषित अंकशास्त्रज्ञ अशोक खरात याला नाशिक गुन्हे शाखेने बुधवारी पहाटे 3 वाजता बेड्या ठोकल्या आहेत. एका 35 वर्षीय महिलेवर गुंगीचे औषध देऊन बलात्कार केल्याचा गंभीर आरोप त्याच्यावर आहे. मात्र, या अटकेनंतर समोर आलेले धागेदोरे संपूर्ण महाराष्ट्राला हादरवून सोडणारे आहेत.
नेमकं प्रकरण काय?
अशोक खरात हा मर्चंट नेव्हीतून निवृत्त झाल्याचा दावा करायचा. सिन्नर तालुक्यातील मिरगाव येथे त्याने ‘श्री ईशान्येश्वर मंदिर ट्रस्ट’ स्थापन केले होते. कॉस्मॉलॉजी आणि अंकशास्त्राचा आधार घेऊन तो लोकांच्या भविष्याबद्दल भाष्य करायचा. याच विश्वासाचा फायदा घेत त्याने एका पीडित महिलेला आपल्या जाळ्यात ओढले आणि तिच्यावर अत्याचार केला. याप्रकरणी नाशिकच्या सरकारवाडा पोलीस ठाण्यात गुन्हा दाखल होताच गुन्हे शाखेने तातडीने कारवाई केली.
सत्ताधारी नेते आणि सेलिब्रिटींचे कनेक्शन
खरात हा केवळ एक सामान्य ज्योतिषी नव्हता, तर त्याचे संबंध थेट मंत्रालयापर्यंत होते. मुख्यमंत्री एकनाथ शिंदे, मंत्री राधाकृष्ण विखे पाटील आणि विशेषतः राज्य महिला आयोगाच्या अध्यक्ष रुपाली चाकणकर यांच्यासोबतचे त्याचे फोटो आणि व्हिडिओ आता सोशल मीडियावर वादळ निर्माण करत आहेत.
सर्वात धक्कादायक म्हणजे, रुपाली चाकणकर या खरातच्या पाया पडताना आणि त्याचे ‘पाद्यपूजन’ करताना एका फोटोत दिसत आहेत. ज्या पदावर बसून महिलांना न्याय द्यायचा, त्याच पदावरील व्यक्ती एका भोंदूबाबाच्या अशा प्रकारे आहारी गेल्याने नैतिकतेचे गंभीर प्रश्न उपस्थित होत आहेत. चाकणकर या खरातच्या मंदिर ट्रस्टच्या विश्वस्त देखील आहेत, ज्यामुळे हे प्रकरण अधिकच गुंतागुंतीचे झाले आहे.
58 व्हिडिओंचा ‘डेंजरस’ पेनड्राईव्ह
पोलिसांनी खरातच्या कॅनडा कॉर्नर येथील कार्यालयावर छापा टाकला असता, तिथे एक पेनड्राईव्ह जप्त करण्यात आला आहे. यामध्ये तब्बल 58 व्हिडिओ सापडले असून, त्यात अनेक नामांकित महिला, राजकीय नेते आणि सेलिब्रिटी असल्याचे समजते. हे व्हिडिओ ब्लॅकमेलिंगसाठी वापरले जात होते का? हा आता तपासाचा मुख्य केंद्रबिंदू आहे.
