Pune Crime : पिंपरी : खेड तालुक्यातील कुरुळी येथे एक अत्यंत धक्कादायक घटना उघडकीस आली आहे. प्रेमसंबंधात अडथळा ठरत असल्याच्या कारणावरून आईने आपल्या प्रियकराच्या मदतीने सहा वर्षांच्या मुलाची हत्या केल्याचे समोर आले आहे. या घटनेमुळे परिसरात संताप आणि भीतीचे वातावरण निर्माण झाले आहे.
अवेज मेहबूब शेख, वय 6, असे मृत मुलाचे नाव आहे. या प्रकरणात पोलिसांनी बसरीन मेहबूब शेख, वय 27, हिला अटक केली आहे. तिचा प्रियकर राम विनायक कजेवाड याच्याविरुद्ध गुन्हा दाखल करण्यात आला असून तो सध्या फरार आहे. या प्रकरणी इसाक महमद शेख, वय 49, यांनी तक्रार दिली आहे.
मिळालेल्या माहितीनुसार, 4 एप्रिल रोजी रात्री सुमारे 11.30 वाजण्याच्या सुमारास ही घटना घडली. आरोपी महिला आणि तिच्या प्रियकराने मुलाला बाथरूममध्ये नेले. तेथे त्याचे डोके पाण्याने भरलेल्या बादलीत बुडवले आणि भिंतीवर आपटून त्याची हत्या केली. या घटनेनंतर त्यांनी मृतदेह बीड जिल्ह्यातील धर्मापुरी येथे नेला आणि मुलाचा मृत्यू हृदयविकाराच्या झटक्याने झाल्याचा बनाव केला.
मात्र, मुलाच्या मृत्यूबाबत नातेवाइकांना संशय आल्याने त्यांनी पोलिसांना माहिती दिली. त्यानंतर शवविच्छेदन करण्यात आले असता मुलाचा मृत्यू पाण्यात बुडाल्यामुळे झाल्याचे स्पष्ट झाले. पोलिसांनी चौकशी केल्यावर आरोपी महिलेने गुन्ह्याची कबुली दिली.
पोलिसांनी आरोपी महिलेला न्यायालयात हजर केले असता तिला 13 तारखेपर्यंत पोलीस कोठडी सुनावण्यात आली आहे. फरार आरोपीचा शोध घेण्यासाठी पोलिसांची पथके रवाना करण्यात आली आहेत. या घटनेमुळे समाजात संताप व्यक्त होत असून पोलिस पुढील तपास करत आहेत.
