Pune Metro : पुणे महानगर प्रदेश विकास प्राधिकरणाच्या मेट्रो लाइन-3 चा पहिला टप्पा पुढील महिन्यात सुरू होण्याची शक्यता आहे. हिंजवडी ते शिवाजीनगर या मार्गावरील सुमारे 12 किलोमीटरचा टप्पा मे महिन्यात सुरू करण्याचे नियोजन आहे.
ही मेट्रो सेवा सुरू झाल्यानंतर प्रवाशांना मेट्रो-3 आणि महाराष्ट्र मेट्रो रेल्वे कॉर्पोरेशनच्या मेट्रोमधून एकाच तिकीटावर प्रवास करता येणार आहे. त्यासाठी एकत्र तिकीट प्रणाली विकसित करण्यात येत असून हे काम अंतिम टप्प्यात आहे. हिंजवडी-शिवाजीनगर मेट्रो सुरू होईपर्यंत ही प्रणाली कार्यान्वित करण्याची तयारी सुरू आहे.
सध्या महाराष्ट्र मेट्रो रेल्वे कॉर्पोरेशनकडून वनाझ ते रामवाडी आणि पिंपरी ते स्वारगेट या मार्गांवर मेट्रो सेवा सुरू आहे. नव्या मेट्रो लाइन-3 ला जिल्हा न्यायालय मेट्रो स्थानकाशी जोडण्यात येणार असून यासाठी पादचारी पुलाचे काम सुरू आहे.
दोन्ही मेट्रो सेवांमध्ये प्रवास सुलभ करण्यासाठी एकच तिकीट प्रणाली लागू करण्यावर भर देण्यात आला आहे. यासाठी संबंधित अधिकाऱ्यांच्या 4 ते 5 बैठका झाल्या आहेत. मेट्रो कार्ड दोन्ही सेवांमध्ये वापरता येईल, यासाठी तांत्रिक समन्वयाचे काम सुरू आहे. ‘वन पुणे कार्ड’च्या माध्यमातून ही सेवा उपलब्ध करून देण्याची तयारी करण्यात येत आहे.
याशिवाय पुणे, पिंपरी-चिंचवड आणि पीएमआरडीए हद्दीत सार्वजनिक वाहतूक वापरणाऱ्या प्रवाशांसाठी मेट्रो आणि बस सेवांसाठी एकाच कार्डचा वापर करता यावा, यासाठीही प्रयत्न सुरू आहेत. यासंदर्भात महाराष्ट्र मेट्रो रेल्वे कॉर्पोरेशन आणि पुणे महानगर परिवहन महामंडळाच्या अधिकाऱ्यांमध्ये बैठक झाली आहे.
