पुणे: पुणे आणि पिंपरी-चिंचवड महापालिकेतील भाजपच्या नगरसेवकांसाठी विशेष प्रशिक्षण कार्यशाळेचे आयोजन करण्यात आले आहे. रामभाऊ म्हाळगी प्रबोधिनी येथे होणाऱ्या या दोनदिवसीय कार्यशाळेत मुख्यमंत्री देवेंद्र फडणवीस नगरसेवकांशी संवाद साधणार असल्याची माहिती समोर आली आहे. याशिवाय भाजप प्रदेशाध्यक्ष रवींद्र चव्हाण आणि पक्षातील वरिष्ठ नेतेही मार्गदर्शन करणार आहेत.
पुणे महापालिकेतील भाजपच्या कारभारावर विरोधकांकडून सातत्याने टीका होत असते. त्याचबरोबर पक्षातील पदाधिकारी आणि नगरसेवकांमध्ये समन्वयाचा अभाव असल्याच्या चर्चाही यापूर्वी समोर आल्या आहेत. काही नगरसेवकांनी आपल्याला निर्णय प्रक्रियेत पुरेसे विश्वासात घेतले जात नसल्याच्या तक्रारी वरिष्ठ नेत्यांकडे केल्याचे वृत्त आहे.
या पार्श्वभूमीवर होणाऱ्या कार्यशाळेकडे विशेष लक्ष लागले आहे. महापालिकेचा कारभार, नगरसेवकांची जबाबदारी, पक्ष संघटनेशी समन्वय आणि नागरिकांशी संवाद यासह विविध विषयांवर या प्रशिक्षणात मार्गदर्शन होण्याची शक्यता आहे. रामभाऊ म्हाळगी प्रबोधिनीमध्ये लोकप्रतिनिधींसाठी प्रशासन, सुशासन आणि स्थानिक स्वराज्य संस्थांच्या कामकाजाशी संबंधित प्रशिक्षण दिले जाते.
दरम्यान, पुणे आणि पिंपरी-चिंचवडमधील पक्षाच्या स्थानिक कारभाराबाबत वरिष्ठ नेतृत्वाकडून मार्गदर्शन मिळावे, यासाठी ही कार्यशाळा महत्त्वाची ठरू शकते. त्यामुळे या कार्यशाळेत मुख्यमंत्री फडणवीस नगरसेवकांना नेमके कशाबद्दल मार्गदर्शन करणार आणि महापालिकेच्या कामकाजाबाबत कोणते मुद्दे मांडले जाणार, याकडे पुणे आणि पिंपरी-चिंचवडच्या राजकीय वर्तुळाचे लक्ष लागले आहे.
