दौंड, ता.24: पाटस (ता. दौंड) येथील सुशिक्षित तरुण प्रदीप उर्फ कान्हा विजय जगताप (वय -26) याचे मंगळवारी (ता.23) रात्री साडेदहा वाजण्याच्या सुमारास अल्पशा आजाराने निधन झाले. हुशार, प्रेमळ व मनमिळाऊ स्वभावाचा तरुण हरपल्याने परिसरात शोककळा पसरली आहे. त्याच्या पश्चात आजी, आई, वडील, भाऊ व भाऊजय असा परिवार आहे.
मागील तीन चार वर्षापूर्वी प्रदीप जगताप याला खेळताना अंगाला मार लागला होता. त्याच्यावर पुण्यासह जिल्ह्यातील अनेक रुग्णालयात उपचार करण्यात आले होते. मात्र त्याच्या प्रकृतीमध्ये कधी सुधारणा तर कधी तब्बेत बिघडत होती. मागील आठ दिवसापूर्वी त्याची तब्बेत अचानक खालावली. त्याला पुण्यातील एका बड्या रुग्णालयात उपचारासाठी दाखल करण्यात आले. परंतु, त्याची मंगळवारी (ता.23) रात्री साडेदहा वाजण्याच्या सुमारास उपचारादरम्यान प्राणज्योत मालवली.
दरम्यान, प्रदीप उर्फ कान्हा जगताप यांच्या पार्थिवावर पाटस येथील स्मशानभूमीत शोकाकुल वातावरणात बुधवारी (ता.24) सकाळी दहा वाजण्याच्या सुमारास अंत्यसंस्कार करण्यात आले. यावेळी राजकीय, सामाजिक व सहकार क्षेत्रातील पदाधिकारी व कर्मचाऱ्यांनी मोठ्या संख्येने हजेरी लावली. आमदार ॲड राहुल कुल यांचे निकटवर्तीय म्हणून ओळख असलेले विजय जगताप यांचे ते धाकटे चिरंजीव होत.
