पुणे : पुणे-सोलापूर महामार्गावरील हडपसर ते उरुळीकांचन या महत्त्वाच्या मार्गाची सध्या मोठ्या प्रमाणात खराब अवस्था झाली आहे. ठिकठिकाणी पडलेले खड्डे, साचलेले पाणी आणि खराब झालेल्या रस्त्यामुळे वाहनचालकांना मोठ्या अडचणींचा सामना करावा लागत आहे. या पार्श्वभूमीवर रस्त्याची तातडीने दुरुस्ती करावी, अशी मागणी पंचायत समिती हवेलीचे सभापती युवराज काकडे यांनी संबंधित यंत्रणांकडे केली आहे.
पावसामुळे रस्त्यावरील खड्ड्यांमध्ये पाणी साचत असल्याने वाहनचालकांना त्यांची खोली आणि आकार लक्षात येत नाही. त्यामुळे अचानक वाहन खड्ड्यात जाण्याची शक्यता वाढली असून अपघाताचा धोका निर्माण झाला आहे. दररोज या मार्गावर मोठ्या प्रमाणात वाहनांची वर्दळ असते. रस्ता खराब असल्याने वाहतुकीचा वेग कमी होऊन अनेक वेळा मोठी कोंडी होत असल्याचे नागरिकांचे म्हणणे आहे.
या भागातील अडचणी केवळ मुख्य रस्त्यापुरत्या मर्यादित नाहीत. MNGL गॅस पाइपलाइनच्या कामामुळे रस्त्याच्या कडेला असलेला साइड पट्टाही खराब झाला आहे. त्यामुळे विशेषतः दुचाकीस्वारांना मोठा त्रास होत असून, घसरून पडण्याच्या घटनांचा धोका वाढला आहे.
युवराज काकडे यांनी राष्ट्रीय महामार्ग प्राधिकरण (NHI) आणि महाराष्ट्र राज्य पायाभूत सुविधा विकास महामंडळ (MSIDC) यांच्या अधिकाऱ्यांकडे तातडीने पाहणी करण्याची मागणी केली आहे. मुख्य रस्त्यासोबतच खराब झालेल्या साइड पट्ट्याचीही दुरुस्ती करण्याची गरज त्यांनी व्यक्त केली.
दरम्यान, पुणे-सोलापूर आणि पुणे-अहिल्यानगर महामार्गावर प्रस्तावित बहुमजली उड्डाणपुलांच्या कामाच्या पार्श्वभूमीवर लवकरच संयुक्त पाहणी केली जाणार आहे. आमदार ज्ञानेश्वर उर्फ माऊली आबा कटके यांच्या नेतृत्वाखाली अधिकारी, पदाधिकारी, स्थानिक ग्रामस्थ आणि रस्त्यालगतचे शेतकरी यांच्यासोबत समन्वय बैठक होणार असल्याची माहिती काकडे यांनी दिली.
हडपसर-उरुळीकांचन हा वाहतुकीच्या दृष्टीने महत्त्वाचा मार्ग असल्याने दुरुस्तीचे काम लवकर सुरू करावे, अशी मागणी नागरिकांकडूनही होत आहे.
