लोणी काळभोर, ता. 5 : थेऊर फाटा परिसरातील नयन बार हॉटेलजवळ सुरू असलेल्या कथित जुगार अड्ड्यावर लोणी काळभोर पोलिसांनी गुरुवारी (ता. 4) दुपारी दोनच्या सुमारास छापा टाकला. मात्र पोलिसांची चाहूल लागताच जुगार खेळणारे आणि जुगार चालविणारे इसम घटनास्थळावरून शेतातून पळून जाण्यात यशस्वी झाले. या प्रकरणी जुगाराचे साहित्य जप्त करण्यात आले असून दोन जणांविरुद्ध गुन्हा दाखल करण्यात आला आहे.
विकास कांबळे व रमेश तुपे अशी गुन्हा दाखल झालेल्या आरोपींची नावे आहेत. याप्रकरणी पोलीस अंमलदार सचिन भिमराव सोनवणे यांनी लोणी काळभोर पोलिस ठाण्यात सरकारतर्फे फिर्याद दिली आहे. पोलिसांना गोपनीय माहितीदारामार्फत थेऊर फाटा येथील नयन बार हॉटेलजवळ पत्र्याच्या शेडच्या आडोशाला अवैध जुगार सुरू असल्याची माहिती मिळाली होती.
त्यानुसार वरिष्ठ अधिकाऱ्यांच्या मार्गदर्शनाखाली पोलिसांचे पथक पंचांसह घटनास्थळी दाखल झाले. पोलिसांनी परिसराची खात्री करून दुपारी दोनच्या सुमारास छापा टाकला. मात्र पोलिसांची चाहूल लागताच जुगार खेळणारे इसम जुगाराचे साहित्य जागेवरच टाकून जवळील मोकळ्या शेतातून पसार झाले. घटनास्थळी पाहणी केली असता ‘सोरट पंती पाकुळी’ या प्रकारच्या जुगारासाठी वापरण्यात येणारा चार्ट आणि दोन लोखंडी कॉईन असे साहित्य आढळून आले. पोलिसांनी ते पंचांसमक्ष जप्त करून सीलबंद केले.
पोलिसांनी परिसरातील नागरिकांकडे चौकशी केली असता, हा जुगार अड्डा विकास कांबळे हा चालवत असून ज्या जागेवर जुगार सुरू होता ती जागा रमेश तुपे यांच्या मालकीची असल्याची माहिती समोर आली. या प्रकरणी लोणी काळभोर पोलिसांनी महाराष्ट्र जुगार अधिनियम कलम 12 (अ) अन्वये गुन्हा दाखल केला असून पुढील तपास सुरू आहे.
