लोणी काळभोर, ता. २३ : पुणे–सोलापूर महामार्गावर रात्री उशिरापर्यंत सुरू असलेल्या अनधिकृत अंडाभुर्जी व मॅगी गाड्यांमुळे वाहतुकीस मोठा अडथळा निर्माण होत असून, नागरिकांच्या जीवितालाच धोका निर्माण होत असल्याचे समोर आले आहे. या पार्श्वभूमीवर लोणी काळभोर पोलिसांनी २० मे रोजी मध्यरात्री धडक कारवाई करत दोन गाडे चालकांविरोधात गुन्हे दाखल केले आहेत. या कारवाईमुळे महामार्गालगत सुरू असलेल्या अनधिकृत खाद्य व्यवसायांचा प्रश्न पुन्हा ऐरणीवर आला आहे.
अन्नासाहेब जालिंदर सालगुडे (वय ३६, मूळ रा. सालसे, ता. करमाळा, जि. सोलापूर) व लिंगराज बिरप्पा होनपाखरे (वय २१, मूळ रा. उत्तर सोलापूर) अशी गुन्हा दाखल करण्यात आलेल्या आरोपींची नावे आहेत. पोलिसांनी दिलेल्या माहितीनुसार, लोणी काळभोर पोलिसांचे पथक २० मे रोजी मध्यरात्री रात्रगस्त व पेट्रोलिंग ड्युटीवर होते. यावेळी माळीमळा परिसरातील पुणे–सोलापूर महामार्गावर रस्त्यालगत मोठ्या प्रमाणात गर्दी करून अंडाभुर्जी व मॅगीचे गाडे सुरू असल्याचे निदर्शनास आले.
पोलिसांनी प्रथम जॉयनेस्ट सोसायटीजवळ कारवाई केली. येथे अन्नासाहेब सालगुडे हा रस्त्याच्या कडेला अंडाभुर्जीचा गाडा उभारून व्यवसाय करत होता. या गाड्यामुळे महामार्गावरील वाहतूक धोकादायक पद्धतीने मंदावत होती. ग्राहकांची गर्दी थेट रस्त्यावर होत असल्याने अपघाताचा मोठा धोका निर्माण झाला होता. त्यामुळे पोलिसांनी त्याच्याविरोधात भारतीय न्याय संहितेच्या कलम २८५ अंतर्गत गुन्हा दाखल केला.
यानंतर काही अंतरावर श्री गणेश वॉशिंग सेंटरजवळ दुसरी कारवाई करण्यात आली. येथे लिंगराज बिरप्पा होनपाखरे हा मॅगी व अंडाभुर्जीचा गाडा चालवत असल्याचे आढळून आले. त्याच्याही गाड्यामुळे रस्त्यावर वाहतुकीस अडथळा निर्माण होत होता. नागरिकांच्या सुरक्षेला धोका निर्माण होत असल्याने त्याच्यावरही भारतीय न्याय संहिता कलम २८५ नुसार गुन्हा दाखल करण्यात आला.
हि कामगिरी लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली सहाय्यक पोलीस निरीक्षक अंकूश बोराटे, पोलीस हवालदार संतोष बारगाजे, चंद्रकांत माने पोलीस अंमलदार दिपक अर्जुन गायकवाड, हनुमंत शिवराम शिंगाडे व महिला पोलीस रुपाली कदम यांच्या पथकाने केली आहे.
