लोणी काळभोर, ता. १२ : विश्वराज हॉस्पिटलसमोर उभी असलेली एका पोलीस कर्मचाऱ्याची कार परवानगीशिवाय घेऊन जात मद्यधुंद अवस्थेतील युवकाने भरधाव वेगात अॅक्टिव्हाला धडक दिल्याची धक्कादायक घटना घडली आहे. हि कदमवाकवस्ती (ता. हवेली) ग्रामपंचायत हद्दीतील समता नगर परिसरात गुरुवारी (ता. 11) दुपारी दुपारी साडेतीन वाजण्याच्या सुमारास घडली. या अपघातात कार आणि अॅक्टिव्हाचे मोठे नुकसान झाले असून लोणी काळभोर पोलिसांनी आरोपीविरुद्ध गुन्हा दाखल केला आहे.
याबाबत लोणी काळभोर पोलीस ठाण्यात कार्यरत असलेले पोलीस अंमलदार तौसीफ रसुल सय्यद यांनी फिर्याद दिली आहे. त्यानुसार सागर शिवाजी सावंत (वय ३०, रा. समतानगर, कदमवाकवस्ती) याच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, पोलीस अंमलदार तौसीफ सय्यद हे त्यांच्या आई-वडिलांच्या औषधांसाठी पुण्यात गेले होते. औषधे घेतल्यानंतर ते दुपारी साडेतीनच्या सुमारास लोणी काळभोर येथील विश्वराज हॉस्पिटल परिसरात आले. त्यांनी त्यांची मारुती स्विफ्ट डिझायर (एमएच १२ टीके १३८१) ही कार राजधानी बेकरीसमोर उभी केली.
यावेळी कारची चावी गाडीतच राहिली होती. बेकरीत जाण्यापूर्वी त्यांची भेट हॉस्पिटलमधील सुरक्षा पर्यवेक्षक यादव उसपुलवार यांच्याशी झाली. त्याचवेळी एक इसम कार घेऊन जाताना दिसला. सुरक्षा पर्यवेक्षकाने तो आपल्याला परिचित असून कार हॉस्पिटलच्या पार्किंगमध्ये लावत असल्याचे सांगितल्याने सय्यद यांनी त्याकडे दुर्लक्ष केले.मात्र काही वेळानंतर कार पार्किंगमध्ये दिसून न आल्याने शोधाशोध सुरू करण्यात आली.
चौकशीअंती कार घेऊन जाणारा इसम सागर सावंत असल्याचे समोर आले. त्याचा शोध घेत असताना कदमवाकवस्ती येथील पाण्याच्या टाकीजवळ नागरिकांची गर्दी दिसली. तेथे जाऊन पाहिले असता सागर सावंत याने कार भरधाव चालवत उभी असलेल्या अॅक्टिव्हा (एमएच १२ पीबी ११८९) ला जोरदार धडक दिल्याचे आढळून आले. ही अॅक्टिव्हा गणेश जालिंदर डोळसे यांच्या मालकीची असून ती घरासमोर उभी करण्यात आली होती. धडकेत अॅक्टिव्हाचे मोठे नुकसान झाले, तसेच कारचेही नुकसान झाले. घटनास्थळी सागर सावंत याच्या तोंडाला मद्याचा वास येत असल्याने तो मद्यधुंद अवस्थेत असल्याचा संशय व्यक्त करण्यात आला.
दरम्यान, स्थानिक नागरिकांनी तत्काळ ११२ वर फोन करून पोलिसांना पाचारण केले. पोलिसांनी घटनास्थळी धाव घेत आरोपीला ताब्यात घेतले. परवानगीशिवाय कार घेऊन जाणे, निष्काळजीपणे वाहन चालवून अपघात घडवणे व वाहनांचे नुकसान केल्याप्रकरणी त्याच्याविरुद्ध गुन्हा दाखल करण्यात आला असून पुढील तपास सुरू आहे.
