पुणे : गणेशोत्सवाची तयारी सुरू असतानाच पुण्यातील गणेश मंडळांसाठी आणि गणेशभक्तांसाठी दिलासादायक निर्णय घेण्यात आला आहे. यंदाच्या गणेशोत्सवात ठराविक 5 दिवस रात्री 12 वाजेपर्यंत लाऊडस्पीकर वापरण्यास विशेष परवानगी देण्यात आली आहे. पुणे जिल्हाधिकारी जितेंद्र डुड्डी यांनी याबाबत आदेश जारी केले आहेत.
जिल्हाधिकाऱ्यांच्या आदेशानुसार, गणेशोत्सवातील 19, 20, 22, 23 आणि 25 सप्टेंबर या 5 दिवसांसाठी ही विशेष सवलत लागू राहणार आहे. त्यामुळे या दिवशी पुणे शहर आणि जिल्ह्यातील गणेश मंडळांना रात्री 12 वाजेपर्यंत लाऊडस्पीकरचा वापर करता येणार आहे.
गेल्या काही दिवसांपासून पुण्यात DJच्या वापरावरून चर्चा सुरू होती. त्यातच प्रशासनाने घेतलेल्या या निर्णयामुळे गणेश मंडळांना मोठा दिलासा मिळाला आहे. विशेष परवानगी मिळाल्याने मंडळांना रात्री उशिरापर्यंत विविध कार्यक्रमांचे आयोजन करता येणार आहे.
गणेशोत्सवात धार्मिक कार्यक्रमांसह भजन, कीर्तन, सांस्कृतिक कार्यक्रम, सामाजिक उपक्रम आणि जनजागृतीपर कार्यक्रम मोठ्या प्रमाणात घेतले जातात. त्यामुळे या कार्यक्रमांसाठी रात्री 12 वाजेपर्यंत लाऊडस्पीकर वापरण्याची परवानगी मिळाल्याने गणेशभक्तांमध्येही उत्साहाचे वातावरण आहे.
मात्र, विशेष परवानगी असली तरी ध्वनी प्रदूषणासंदर्भातील नियमांचे पालन करणे बंधनकारक राहणार आहे. लाऊडस्पीकरचा वापर करताना प्रशासनाने ठरवून दिलेल्या मर्यादा पाळाव्या लागतील. तसेच नागरिकांना त्रास होणार नाही, याचीही मंडळांनी काळजी घेण्याचे आवाहन करण्यात आले आहे.
