पिंपरी: पिंपरी-चिंचवड शहरातील वाकड परिसरात सुपरमार्केटमधून महागड्या वस्तू चोरणाऱ्या टोळीचा वाकड पोलिसांनी पर्दाफाश केला आहे. या कारवाईत 4 महिलांसह 7 जणांना अटक करण्यात आली असून, त्यांच्याकडून 7 लाख 21 हजार रुपयांचा मुद्देमाल जप्त करण्यात आला आहे. ही टोळी कार आणि रिक्षाच्या माध्यमातून वेगवेगळ्या ठिकाणी जाऊन चोरी करत असल्याचे तपासात समोर आले आहे.
अटक केलेल्यांमध्ये रविकांत देवानंद जाकरे, ब्रिजेश सीताराम मदेशिया, ब्रिजेश बाळू यादव, सोनम बाबू शेख, सानिया बाबूमिया शेख, रुमा ब्रिजेश मदेशिया आणि सलमा शकील शेख यांचा समावेश आहे. सलमा शेख यांचे वय 71 वर्षे असून त्या भोसरीतील बालाजीनगर परिसरात राहत असल्याची माहिती पोलिसांनी दिली.
पोलिसांच्या माहितीनुसार, या टोळीचे मुख्य लक्ष्य सुपरमार्केटमधील महागड्या वस्तू असायच्या. काजू, बदाम, तूप आणि इतर ड्रायफ्रूट्स चोरून नेण्यासाठी आरोपी दुकानात प्रवेश करायचे. गर्दीचा फायदा घेत काही वेळातच वस्तू लंपास करून ते वाहनातून पसार होत होते.
घटनांचा तपास करताना पोलिसांनी परिसरातील अनेक CCTV कॅमेऱ्यांचे फुटेज तपासले. तांत्रिक माहितीच्या आधारे संशयित वाहनांचा माग काढण्यात आला. कार मुंबईच्या दिशेने गेल्यानंतर पुन्हा पिंपरी-चिंचवडमध्ये येत असल्याची माहिती मिळताच पोलिसांनी ताथवडे-वाकड परिसरात सापळा रचला. कार आणि रिक्षासह सातही संशयितांना ताब्यात घेण्यात आले. चौकशीत आरोपींनी चोरीच्या घटनांची माहिती दिल्याचे पोलिसांनी सांगितले. ही कारवाई पोलीस उपायुक्त प्रदीप जाधव यांच्या मार्गदर्शनाखाली करण्यात आली.
