पुणे : पुण्यात डीजेवरून वातावरण तापलं असताना आता बिबवेवाडी भागात नियम डावलून मोठ्या आवाजात लाऊडस्पीकर वाजवल्यामुळे ‘श्रीकृष्ण तरुण मंडळावर’ पोलिसांनी कायदेशीर कारवाई केली आहे. याप्रकरणी मंडळाचे अध्यक्ष राहुल प्रकाश जगताप यांच्यावर गुन्हा नोंदवण्यात आला आहे. या संपूर्ण मोसमात दहीहंडी उत्सवादरम्यान ध्वनीप्रदूषण नियमांचे उल्लंघन केल्याबद्दल कारवाईला सामोरे जावे लागलेले हे राज्यातील पहिलेच मंडळ ठरले आहे.
बिबवेवाडी ओटा परिसरातील या मंडळाने कार्यक्रमासाठी केवळ पारंपारिक वाद्ये वापरण्याची परवानगी पोलिसांकडून घेतली होती. मात्र, प्रत्यक्ष उत्सवात नियमांचा भंग करत तब्बल 8 बेस आणि 8 टॉप लाऊडस्पीकर चालवले गेले. यामुळे प्रचंड ध्वनीप्रदूषण होऊन स्थानिक नागरिकांना मोठा त्रास सहन करावा लागला.घटनेचे गांभीर्य लक्षात घेऊन पोलिसांनी तात्काळ घटनास्थळी धाव घेत मंडळाची संपूर्ण साऊंड सिस्टिम जप्त केली. नियमानुसार दहीहंडी कार्यक्रमांसाठी जास्तीत जास्त 4 बेस आणि 4 टॉप वापरण्याची अट घालण्यात आली होती.
पुण्याचे पोलीस आयुक्त अमितेश कुमार यांनी उत्सवापूर्वीच सर्व मंडळांना नियमांचे तंतोतंत पालन करण्याचे आणि ध्वनीप्रदूषण टाळण्याचे स्पष्ट निर्देश दिले होते. तसेच, आवाजाची मर्यादा ओलांडणाऱ्यांवर कठोर कारवाई करण्याचा इशाराही दिला होता. या पार्श्वभूमीवर ही धडक कारवाई करण्यात आली.
हा एक अपवाद वगळता उर्वरित पुण्यात दहीहंडी उत्सव अत्यंत उत्साहात आणि आनंदात साजरा होत आहे. बहुतांश मंडळे प्रशासकीय नियमांचे पालन करत तसेच पारंपारिक वाद्यांच्या गजरात उत्सव साजरा करत आहेत. शहरात कुठेही अनुचित प्रकार घडल्याचे वृत्त नसून शांततेत दहीहंडी साजरी केली जात आहे.
