पुणे : राज्य सरकारच्या अन्न आणि औषध प्रशासन विभागातील ‘औषध निरीक्षक’ भरती परीक्षेतील पेपरफुटी प्रकरणात नवी धक्कादायक माहिती समोर आली आहे. या घोटाळ्यातील मुख्य संशयित आरोपी गौरव पाटील याच्या नंदुरबार येथील राहत्या घरात मंत्री नरहरी झिरवाळ यांचे विशेष कार्य अधिकारी (OSD) गणेश देवरे हे भाडेकरू म्हणून राहत असल्याचे स्पष्ट झाले आहे. या घटनेमुळे थेट मंत्री कार्यालयाच्या भूमिकेवर प्रश्नचिन्ह निर्माण झाले असून या प्रकरणाशी मंत्रालयाचा प्रत्यक्ष अथवा अप्रत्यक्ष संबंध आहे का, अशी शंका व्यक्त केली जात आहे.
समोर आलेल्या माहितीनुसार, आपल्यावर लागलेल्या गंभीर आरोपांनंतर गणेश देवरे यांनी आपली बाजू मांडत हे सर्व दावे फेटाळून लावले आहेत. “मी आरोपी गौरव पाटील यांच्या घरात भाडेकरू म्हणून राहत होतो ही बाब खरी आहे. परंतु, हा फक्त एक निव्वळ योगायोग आहे. केवळ घरमालक एखाद्या गुन्ह्यात आरोपी ठरला, तर त्या घरात राहणाऱ्या भाडेकरूचाही त्या गुन्ह्यात सहभाग असतो असा निष्कर्ष काढणे चुकीचे आहे,” असे स्पष्टीकरण देवरे यांनी दिले.
पुढे बोलताना ते म्हणाले, आपला या गैरप्रकाराशी दूरवरचाही संबंध नसून केवळ बदनामी करण्याच्या हेतूने हे बिनबुडाचे आरोप केले जात असल्याचे देवरे म्हणाले. खोट्या बातम्या पसरवून आपली प्रतिमा मलिन करणाऱ्यांविरोधात लवकरच कायदेशीर नोटीस पाठवणार असल्याचे त्यांनी सांगितले. याशिवाय, या MPSC पेपरफुटी प्रकरणाची निष्पक्ष चौकशी करून खऱ्या सूत्रधारांवर व दोषींवर कठोर कारवाई झाली पाहिजे, अशी मागणीही त्यांनी केली. या प्रकरणावरून राजकीय वर्तुळात आणि विरोधकांमध्ये जोरदार चर्चा सुरू आहे.
आता पोलीस तपासात या भाडेकरूच्या दाव्यातील तथ्य आणि मंत्री कार्यालयाचा यात काही सहभाग आहे का, हे लवकरच समोर येणार आहे.
