पुणे : गणेशोत्सवाच्या काळात होणाऱ्या डीजे आणि लाऊडस्पीकरच्या तीव्र आवाजाविरोधात आवाज उठवल्यामुळे विद्यानंद बापट सध्या चांगलेच चर्चेत आले आहेत.ध्वनीप्रदूषणाच्या गंभीर समस्येकडे सर्वांचे लक्ष वेधताना त्यांनी अत्यंत स्पष्ट आणि अस्खलित मराठीत आपली बाजू मांडली. त्यांच्या या भूमिकेच्या.समर्थनार्थ आता कला विश्वातील मंडळींनीही पोस्ट शेअर करण्यास सुरुवात केली आहे.
प्रसिद्ध गायक आणि संगीतकार अवधूत गुप्ते यांनी बापट यांच्या भूमिकेला पाठिंबा दर्शवण्यासाठी एक विशेष गाणे तयार केले आहे. “विद्यानंदा ओळख इथल्या आनंदी आनंदा…” असे बोल असणारे हे गाणे त्यांनी सोशल मीडियावर पोस्ट केले असून, त्यातून बापट यांच्या स्पष्टवक्तेपणाचे कौतुक करण्यात आले आहे. या गाण्याच्या माध्यमातून अवधूत यांनी आपल्या अनोख्या शैलीत समाजातील परिस्थितीवर भाष्य केले आहे.
संगीतकार अवधूत गुप्ते यांनी सोशल मीडियावर #SupportBapat आणि #HatsOffBapat यांसारखे हॅशटॅग वापरून त्यांनी हा व्हिडीओ शेअर केला असून, त्याला नेटकऱ्यांचा उदंड प्रतिसाद मिळत आहे.दरम्यान, याआधी लोकप्रिय अभिनेत्री आरती सोलंकी यांनीही सोशल मीडियाद्वारे बापट यांना पाठिंबा दिला होता.
बापट यांच्यावर झालेल्या हल्ल्याचा तीव्र शब्दांत निषेध करत आरती यांनी स्पष्ट केले की, ध्वनीप्रदूषणाविरुद्ध बोलणे म्हणजे सणावर किंवा गणपती बाप्पावर टीका करणे नव्हे. अशा प्रकारे सर्वसामान्यांपासून ते मनोरंजन क्षेत्रातील कलाकारांपर्यंत अनेक जण विद्यानंद बापट यांच्या बाजूने ठामपणे उभे राहिल्याचे दिसून येत आहे.
