मुळशी: पुण्याच्या मुळशी तालुक्यातील नेरे गावातून एक अत्यंत मन हेलावून टाकणारी घटना समोर आली आहे. परराज्यातून पोट भरण्यासाठी पुण्यात आलेल्या दोन मित्रांमध्ये मद्यपान करत असताना झालेल्या क्षुल्लक वादाचे रुपांतर एका भीषण हत्येत झाले आहे. आरोपीने मित्राची निर्घृण हत्या केल्यानंतर पुरावे लपवण्यासाठी त्याचे हात-पाय वायरने बांधून मृतदेह विहिरीत फेकून दिले.
नेरे परिसरातील एका सुरू असलेल्या बांधकामावर पश्चिम बंगालमधील नाडिया जिल्ह्यातील हे दोन्ही तरुण मजूर म्हणून कामा करत होते. पोलिसांनी दिलेल्या माहितीनुसार, संध्याकाळी दोघे मित्र नेहमीप्रमाणे एकत्र बसून मद्यपान करत होते. यादरम्यान त्यांच्यात एका क्षुल्लक कारणावरून बाचाबाची झाली. हा वाद विकोपास गेल्यामुळे संशयित आरोपी संतू उर्फ विशाल बासुदेव मांझी (वय 22) याने आपला मित्र सुमन पात्रा याच्यावर प्राणघातक हल्ला करत त्याची हत्या केली.
खुनाचे सर्व पुरावे नष्ट करण्यासाठी आरोपीने सुमनच्या मृतदेहाचे हात, पाय आणि कंबर एका वायरने अत्यंत घट्ट आवळून बांधले. त्यानंतर मृतदेह नजीकच्या विहिरीत लोटून देत आरोपीने तेथून पळ काढला.
दुसऱ्या दिवशी सकाळी मेमाणे वस्तीमधील विहिरीत मृतदेह तरंगताना दिसल्याने स्थानिकांमध्ये खळबळ उडाली. याप्रकरणी परिसरातील रहिवासी रामदास पांडुरंग मेमाणे (वय 63) यांनी पोलिसात फिर्याद दिली. पोलिसांनी तातडीने तपास करत तांत्रिक विश्लेषणाच्या आधारे अवघ्या काही तासांत मुख्य आरोपी विशाल याला अटक केली असून पुढील तपास सुरू आहे.
