पुणे: पुण्यातील वाघोली परिसरात नशायुक्त इंजेक्शनच्या अवैध साठ्यावर वाघोली पोलिसांनी मोठी कारवाई करत दोन तरुणांना अटक केली आहे. या कारवाईत ‘मॅफेन्टरमाईन सल्फेट’ या इंजेक्शनच्या १०० बाटल्या जप्त करण्यात आल्या असून, त्या ऑनलाईन मागवण्यात आल्याची माहिती प्राथमिक चौकशीत समोर आली आहे. या घटनेमुळे नशायुक्त औषधांच्या बेकायदेशीर विक्रीबाबत गंभीर प्रश्न उपस्थित झाले आहेत.
पुणे पोलिसांच्या परिमंडळ सातमध्ये सध्या ड्रग्ज आणि नशायुक्त पदार्थांविरोधात ‘मिशन क्रॅकडाऊन’ मोहीम सुरू आहे. त्याच मोहिमेअंतर्गत बुधवारी रात्री गस्तीवर असलेल्या वाघोली पोलिसांना गुप्त माहिती मिळाली की, काही तरुण नशेसाठी वापरल्या जाणाऱ्या इंजेक्शनचा मोठा साठा घेऊन येणार आहेत. या माहितीची पडताळणी करून पोलिसांनी आय. व्ही. इस्टेट रोडवरील ऑर्चिड साई प्रॉपर्टीज परिसरात सापळा रचला.
पहाटेच्या सुमारास दोन संशयित तरुण तेथे पोहोचताच पोलिसांनी त्यांना ताब्यात घेतले. चौकशीदरम्यान त्यांची ओळख सूरज पद्माकर भुत्ते (वय १८, मूळ रा. नांदेड, सध्या वाघोली) आणि आकाश गणेश धनवटे (वय १९, रा. लोणीकंद) अशी पटली.
दोघांची झडती घेतली असता त्यांच्याकडून ३० मिली क्षमतेच्या ‘मॅफेन्टरमाईन सल्फेट’ इंजेक्शनच्या १०० बाटल्या आणि गुन्ह्यात वापरण्यात आलेली दुचाकी जप्त करण्यात आली. जप्त केलेल्या मुद्देमालाची एकूण किंमत सुमारे दोन लाख रुपये असल्याची माहिती पोलिसांनी दिली.
प्राथमिक चौकशीत आरोपींनी ही इंजेक्शने ऑनलाईन मागवल्याची माहिती दिली आहे. त्यामुळे या अवैध व्यवहारामागे मोठे नेटवर्क कार्यरत आहे का, याचा तपास आता पोलिसांकडून केला जात आहे. ही इंजेक्शने नेमकी कोणाला विकली जाणार होती, त्यांचा पुरवठादार कोण आहे आणि या साखळीत आणखी किती जणांचा सहभाग आहे, याचा शोध तपास पथक घेत आहे.
या प्रकरणी पोलीस कर्मचारी अशोक अप्पासाहेब शेळके यांच्या फिर्यादीवरून वाघोली पोलीस ठाण्यात औषधे आणि सौंदर्यप्रसाधने अधिनियमांतर्गत गुन्हा दाखल करण्यात आला आहे. नशायुक्त औषधांच्या बेकायदेशीर विक्रीविरोधातील कारवाई आणखी तीव्र करण्यात येणार असल्याचे पोलिसांनी स्पष्ट केले आहे.
