पुणे: पुण्यातील घोरपडे पेठ परिसरात शुक्रवारी भरदिवसा झालेल्या गोळीबाराच्या घटनेमुळे शहरात पुन्हा एकदा गँगवॉरची चर्चा सुरू झाली आहे. पोलीस चौकीसमोरच एका तरुणावर अज्ञात हल्लेखोरांनी गोळीबार केल्याने परिसरात भीतीचे वातावरण निर्माण झाले. या हल्ल्यात नूर शेख हा तरुण गंभीर जखमी झाला असून त्याच्यावर रुग्णालयात उपचार सुरू आहेत.
प्राथमिक माहितीनुसार, नूर शेख याच्यावर तीन गोळ्या झाडण्यात आल्या. गोळीबारानंतर हल्लेखोरांनी घटनास्थळावरून पळ काढला. मात्र, पोलिसांनी तातडीने कारवाई करत मुख्य संशयित सुजल परदेशी याला ताब्यात घेतले आहे. या घटनेमागील नेमके कारण आणि इतर आरोपींचा सहभाग याचा तपास सुरू असून, फरार संशयितांचा शोध घेण्यासाठी पोलिसांनी विशेष पथके रवाना केली आहेत.
या हल्ल्यामागे कासेवाडी परिसरातील परदेशी गँगशी संबंधित व्यक्तींचा सहभाग असण्याची शक्यता पोलिसांकडून तपासली जात आहे. दरम्यान, जखमी नूर शेख हा राज्यभर चर्चेत राहिलेल्या वनराज आंदेकर हत्याप्रकरणातील महत्त्वाचा प्रत्यक्षदर्शी साक्षीदार असल्याची चर्चा आहे. मात्र, या दाव्याबाबत पोलिसांनी अद्याप कोणतीही अधिकृत पुष्टी केलेली नाही.
या घटनेनंतर शहरातील कायदा व सुव्यवस्थेबाबत पुन्हा प्रश्न उपस्थित होऊ लागले आहेत. अलीकडच्या काळात गँगशी संबंधित गुन्ह्यांमध्ये वाढ होत असल्याचे चित्र दिसत असून, काही दिवसांपूर्वीच एका अन्य गँगशी संबंधित खूनप्रकरणामुळेही शहरात खळबळ उडाली होती. त्यानंतर आता भरदिवसा झालेल्या या गोळीबारामुळे नागरिकांमध्ये असुरक्षिततेची भावना निर्माण झाली आहे.
दरम्यान, वनराज आंदेकर खून प्रकरणाशी संबंधित आणखी एका हल्ल्याच्या प्रकरणात विशेष मोक्का न्यायालयाने आंदेकर टोळीतील कृष्णा आंदेकर, स्वराज वाडेकर आणि हर्षल वाडेकर या तिघांना पाच दिवसांची पोलीस कोठडी सुनावली आहे. या दोन्ही घटनांमुळे संबंधित गँगमधील वैमनस्य पुन्हा समोर येत असून, पोलिसांकडून सर्व घटनांचा परस्परसंबंध तपासला जात आहे.
