पुणे: पुण्यातील हडपसर भागातील मगरपट्टा परिसरामध्ये असलेल्या सिझन्स मॉलसमोरील ‘द कॉस्मो पॉलिस’ या नामांकित इमारतीमध्ये एक धक्कादायक प्रकार उघडकीस आला आहे. या इमारतीमध्ये ‘द फॉरेव्हर’ या नावाखाली स्पा सेंटर चालवले जात होते. प्रत्यक्षात या ठिकाणी मसाजच्या नावाखाली अनैतिक धंदे सुरू असल्याचा पर्दाफाश पुणे पोलिसांनी केला आहे. या कारवाईमुळे परिसरात मोठी खळबळ उडाली आहे.
हडपसर पोलीस ठाण्याचे वरिष्ठ पोलीस निरीक्षक हेमंत पाटील यांना या बेकायदेशीर प्रकाराबाबत अत्यंत गुप्त माहिती मिळाली होती. माहिती मिळताच पोलिसांनी तातडीने हालचाली करत एक विशेष तपास पथक तयार केले. कारवाई करण्यापूर्वी पोलिसांच्या पथकाने खात्री करण्यासाठी या स्पा सेंटरमध्ये एक बनावट ग्राहक पाठवला. तिथे वेश्याव्यवसाय सुरू असल्याची खात्री पटताच पोलिसांनी बुधवारी, दिनांक 22 रोजी सायंकाळी साडेसात वाजता अचानक छापा टाकला आणि हे संपूर्ण रॅकेट उद्ध्वस्त केले.
या धडक कारवाई दरम्यान पोलिसांनी स्पा सेंटरमधून तीन पीडित तरुणींची सुटका केली आहे. परराज्यातून किंवा बाहेरून तरुणींना आणून, त्यांना पैशांचे मोठे आमिष दाखवले जात होते आणि त्यांच्याकडून बळजबरीने हा अवैध व्यवसाय करून घेतला जात असल्याचे तपासात समोर आले आहे. या संपूर्ण अनैतिक प्रकाराची मुख्य सूत्रधार आणि स्पा सेंटरची मालकीण अश्विनी मुरडे (रा. कल्याणीनगर) तसेच मॅनेजर रकबुल अब्दुल हुसेन या दोघांविरुद्ध अनैतिक मानवी वाहतूक प्रतिबंधक कायद्यान्वये गंभीर गुन्हे दाखल करण्यात आले आहेत.
