पुणे : महाराष्ट्र अंधश्रद्धा निर्मूलन समितीचे संस्थापक आणि सामाजिक कार्यकर्ते डॉ. नरेंद्र दाभोलकर हत्या प्रकरणात मोठी घडामोड झाली आहे. या प्रकरणातील दोषी सचिन अंदुरे याला मुंबई उच्च न्यायालयाने जामीन मंजूर केला आहे. तसेच त्याला सुनावण्यात आलेल्या जन्मठेपेच्या शिक्षेलाही स्थगिती देण्यात आली आहे.
न्यायमूर्ती सारंग कोतवाल आणि न्यायमूर्ती रणजितसिंह भोसले यांच्या खंडपीठाने हा निर्णय दिला. यापूर्वी या प्रकरणातील सहआरोपी शरद कळसकर यालाही एप्रिलमध्ये उच्च न्यायालयाकडून जामीन मिळाला होता. आता अंदुरेला जामीन मिळाल्याने या प्रकरणात पुन्हा एकदा चर्चा सुरू झाली आहे.
दरम्यान, सीबीआयच्या विशेष न्यायालयाने 2024 मध्ये सचिन अंदुरे आणि शरद कळसकर यांना दोषी ठरवत जन्मठेपेची शिक्षा सुनावली होती. या निर्णयाला दोन्ही आरोपींनी मुंबई उच्च न्यायालयात आव्हान दिले होते. त्यावर सुनावणी करताना न्यायालयाने अंदुरेला जामीन देण्याचा निर्णय घेतला.
डॉ. नरेंद्र दाभोलकर यांची 20 ऑगस्ट 2013 रोजी पुण्यातील शिंदे पुलाजवळ मॉर्निंग वॉक करत असताना गोळ्या झाडून हत्या करण्यात आली होती. या घटनेनंतर तपास सुरू झाला आणि पुढे हे प्रकरण सीबीआयकडे सोपवण्यात आले.
या प्रकरणात वीरेंद्र तावडे, सचिन अंदुरे, शरद कळसकर, वकील संजीव पुनाळेकर आणि विक्रम भावे यांच्याविरोधात आरोपपत्र दाखल करण्यात आले होते. त्यापैकी अंदुरे आणि कळसकर यांना दोषी ठरवण्यात आले, तर वीरेंद्र तावडे, संजीव पुनाळेकर आणि विक्रम भावे यांची पुराव्याअभावी निर्दोष मुक्तता झाली.
पुण्यातील विशेष न्यायालयात या खटल्याला 15 सप्टेंबर 2021 रोजी सुरुवात झाली होती. 10 मे 2024 रोजी न्यायालयाने निकाल दिला. आता उच्च न्यायालयाच्या निर्णयामुळे दाभोलकर हत्या प्रकरणातील पुढील न्यायालयीन प्रक्रियेकडे अनेकांचे लक्ष लागले आहे.
