पुणे : कोल्हापूर जिल्ह्यातील हातकणंगले तालुक्यातून धक्कादायक घटना समोर आली आहे. आर्थिक फसवणुकीमुळे त्रस्त झालेल्या एका 34 वर्षीय इंजिनिअर तरुणाने स्वतःचे आयुष्य संपवले आहे. सूरज अरुण निर्मळे असे या दुर्दैवी तरुणाचे नाव असून, तो कोरोची येथील इंदिरानगर भागातील रहिवासी होता.
आपल्या धाकट्या भावाला व्हॉट्सअॅपवर मेसेज आणि थेट लोकेशन पाठवून सूरजने हे टोकाचे पाऊल उचलले. मेसेजमध्ये त्याने 7 कोटी रुपयांची फसवणूक झाल्यामुळे आत्महत्या करत असल्याचे नमूद केले होते. हा मेसेज पाठवल्यानंतर त्याने आपला मोबाईल बंद केला. भाऊ दीपक निर्मळे याने तातडीने स्थानिक तरुणांना कोरोची ते लक्ष्मी इंडस्ट्री रस्त्यावरील एका शेतातील खोलीवर पाठवले. मात्र, तेथे पोहोचले असता सूरज गळफास घेतलेल्या अवस्थेत आढळून आला.
घटनास्थळी दाखल झालेल्या शहापूर पोलिसांनी मृतदेह ताब्यात घेऊन पंचनामा केला. यावेळी सूरजच्या पॅन्टच्या खिशात एक सुसाईड नोट सापडली. एका व्यक्तीने आपले 7 कोटी रुपये बुडवल्याचे त्याने चिठ्ठीत लिहिले होते. वारंवार पैसे मागूनही ते परत न करता, उलट कुटुंबाला जिवे मारण्याची धमकी दिली जात असल्याने आपण हे पाऊल उचलत असल्याचे सूरजने नमूद केले आहे.
या प्रकरणी शहापूर पोलीस ठाण्यात घटनेची नोंद झाली असून, पोलिसांनी संशयित व्यक्तीचा शोध सुरू केला आहे. हा सर्व प्रकार शेअर मार्केटमधील गुंतवणुकीशी किंवा फसवणुकीशी संबंधित असावा असा प्राथमिक संशय पोलिसांना आहे. तसेच, एका सामान्य तरुणाकडे 7 कोटी रुपयांची रक्कम नेमकी कुठून आली, या दृष्टीनेही पोलीस त्याच्या आर्थिक व्यवहारांची कसून चौकशी करत आहेत.
सूरजच्या अशा अचानक जाण्याने संपूर्ण कोरोची परिसरात तीव्र हळहळ व्यक्त केली जात आहे. त्याच्या पश्चात आजी, आई, पत्नी, लहान मुलगी, भाऊ आणि बहीण असा मोठा परिवार आहे.
