सागर जगदाळे
भिगवण: सिद्धेश्वर निंबोडी ग्रामपंचायतीने महाराष्ट्र राज्य वीज वितरण कंपनीकडे (महावितरण) मंजूर गावठाण फिडरचे काम तातडीने पूर्ण करून सुरू करण्याची मागणी केली आहे. अन्यथा महावितरणच्या कार्यालयासमोर बोंबाबोंब आंदोलन करण्यात येईल, असा इशारा ग्रामपंचायतीने दिला आहे.
ग्रामपंचायत निंबोडीचे सरपंच संतोष मोहन सोनवणे यांनी याबाबत महावितरणचे मुख्य अभियंता, बारामती झोन यांना निवेदन दिले आहे. निवेदनात नमूद केल्याप्रमाणे, सिद्धेश्वर निंबोडी हे बारामती तालुक्यातील मोठे गाव असून गावात सायंकाळी ६ ते रात्री १० या वेळेत वारंवार लोडशेडिंग केले जात आहे. तसेच वीजपुरवठा अनेकदा मनमानी पद्धतीने खंडित होत असल्याने ग्रामस्थांना मोठ्या अडचणींचा सामना करावा लागत आहे.
सततच्या वीजखंडितामुळे विद्यार्थ्यांच्या अभ्यासावर परिणाम होत असून पिण्याच्या पाण्याच्या योजनेचाही पुरवठा विस्कळीत होत आहे. गावासाठी मंजूर करण्यात आलेला गावठाण फिडर गेल्या दीड वर्षांपासून प्रलंबित असून अद्याप सुरू करण्यात आलेला नाही. त्यामुळे गावकऱ्यांमध्ये तीव्र नाराजी व्यक्त होत आहे.
मंजूर गावठाण फिडरचे काम तातडीने पूर्ण करून नियमित व अखंडित वीजपुरवठा सुरू करावा, अशी मागणी ग्रामपंचायतीने केली आहे. मागणीची दखल न घेतल्यास महावितरण कार्यालयासमोर बोंबाबोंब आंदोलन करण्यात येईल, असा इशाराही निवेदनातून देण्यात आला आहे. या निवेदनाच्या प्रती उपमुख्यमंत्री सुनेत्रा पवार, खासदार पार्थ पवार, महावितरणचे वरिष्ठ अधिकारी, तहसीलदार बारामती, उपविभागीय पोलीस अधिकारी बारामती तसेच संबंधित पोलीस ठाण्यांना माहितीस्तव पाठविण्यात आल्या आहेत.
