फुरसुंगी, ता. २५ : फुरसुंगी येथील एका खुले निवारागृहात कार्यरत असलेल्या २६ वर्षीय युवकाने गळफास घेऊन आत्महत्या केल्याची धक्कादायक घटना २२ जून रोजी दुपारच्या सुमारास उघडकीस आली आहे. आत्महत्येपूर्वी लिहिलेल्या कथित सुसाईड नोटमध्ये संस्थाचालकाकडून होत असलेला मानसिक छळ, कमी पगारात अतिरिक्त कामाचा बोजा आणि करिअर उद्ध्वस्त करण्याच्या धमक्या यांचा उल्लेख करण्यात आल्याने या प्रकरणाने खळबळ उडाली आहे.
अतुल अंकुश लाळगे (वय २६) असे आत्महत्या केलेल्या तरुणाचे नाव आहे. अतुलचा चुलत भाऊ अनिकेत लाळगे यांनी फुरसुंगी पोलीस ठाण्यात फिर्याद दिली आहे. त्यानुसार संस्थाचालक बालाजी मुस्कवाड यांच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, अतुल लाळगे हा गेल्या अडीच वर्षांपासून फुरसुंगी येथील श्री साई सेवाभावी संस्था संचलित खुले निवारागृहात कार्यरत होता. त्याने संस्थेच्या आवारात गळफास घेऊन आत्महत्या केली. त्याला तातडीने ससून रुग्णालयात दाखल करण्यात आले; मात्र डॉक्टरांनी त्याला दाखलपूर्व मृत घोषित केले.
या घटनेनंतर अतुलचा चुलत भाऊ अनिकेत लाळगे याने फुरसुंगी पोलिसांकडे दिलेल्या फिर्यादीत गंभीर आरोप केले आहेत. अतुलने लिहिलेल्या सुसाईड नोटमध्ये संस्थाचालक बालाजी मुस्कवाड यांच्याकडून गेल्या अडीच वर्षांपासून कमी पगारावर प्रचंड काम करून घेतले जात असल्याचा उल्लेख आहे. संस्थेत आवश्यक मनुष्यबळ नसताना सर्व जबाबदाऱ्या एकट्याच अतुलवर टाकल्या जात होत्या. मुलांच्या देखभालीपासून कार्यालयीन कामे, कागदपत्रे, इतर संस्थांची कामे आणि वैयक्तिक कामांपर्यंत सर्व जबाबदाऱ्या त्याच्यावर सोपविल्या गेल्याचा दावा करण्यात आला आहे.
तसेच संस्थेत घडणाऱ्या कोणत्याही घटनेची जबाबदारी त्याच्यावर टाकली जात होती. काम सोडण्याचा विचार व्यक्त केल्यास त्याच्यावर खोटे गुन्हे दाखल करून आयुष्य उद्ध्वस्त करण्याच्या धमक्या दिल्या जात असल्याचेही सुसाईड नोटमध्ये नमूद असल्याचा आरोप आहे. सततचा मानसिक त्रास, अपमानास्पद वागणूक आणि आर्थिक अडचणींमुळे तो नैराश्यात गेल्याचेही त्यात नमूद करण्यात आले आहे. मृताच्या कुटुंबीयांनीही अतुलने काही दिवसांपूर्वी कामाच्या ठिकाणी होणाऱ्या त्रासाबाबत तक्रारी केल्याचे सांगितले आहे. बहिणीशी झालेल्या संभाषणात त्याने नोकरी सोडण्याची इच्छा व्यक्त केली होती, अशी माहितीही समोर आली आहे.
दरम्यान, या प्रकरणी फुरसुंगी पोलिसांनी संस्थाचालक बालाजी मुस्कवाड यांच्याविरोधात आत्महत्येस प्रवृत्त केल्याप्रकरणी तक्रार नोंदवून पुढील तपास सुरू केला आहे. सुसाईड नोट, संस्थेतील कामकाज आणि संबंधितांच्या जबाबांच्या आधारे पोलिसांकडून सखोल चौकशी करण्यात येत आहे. एका सामाजिक संस्थेत कामाच्या ताणामुळे तरुण कर्मचाऱ्याने आत्महत्या केल्याचा आरोप झाल्याने सामाजिक क्षेत्रातही मोठी खळबळ उडाली आहे.
