पुणे: पुणे जिल्ह्यातील शिरूर अंतर्गत येणाऱ्या पिंपळे जगताप गावातील पाझर तलावात काही दिवसांपूर्वी एका तरुणाचा मृतदेह सापडला होता. या गुंतागुंतीच्या प्रकरणाचा छडा लावण्यात शिक्रापूर पोलिसांच्या पथकाला अवघ्या ७२ तासांत मोठे यश मिळाले आहे. या प्रकरणात बिहार व नांदेडचे कनेक्शन असलेले ३ संशयित आरोपी पोलिसांच्या जाळ्यात अडकले आहेत.
मृतदेह पाण्यात बराच काळ कुजलेल्या अवस्थेत असल्यामुळे त्याची प्राथमिक ओळख पटवणे पोलिसांना कठीण जात होते. परंतु, १९ जुलैच्या रात्रीच्या सुमारास एल अँड टी फाटा परिसरात गस्तीवर असलेले पोलीस शिपाई लखन शिरसकर यांनी काही तरुणांच्या हालचाली संशयास्पद हेरल्या. पोलिसांनीचौकशी केली असता, हे तरुण बिहारमधील जेहानाबाद येथून बेपत्ता झालेल्या टुटुकुमार अजित यादव (वय 22) या तरुणाचा शोध घेत असल्याचे समोर आले. त्यानंतर तांत्रिक विश्लेषणाची मदत घेत पोलिसांनी तलावातील ती मृत व्यक्ती टुटुकुमारच असल्याचे शिक्कामोर्तब केले.
पोलिसी चौकशीत धक्कादायक खुलासे झाले असून, मुख्य आरोपीच्या शेतातील पाण्याची मोटार टुटुकुमारनेच लांबवली आहे, असा तीव्र संशय आरोपीच्या मनात होता; ज्यामुळे आपले मोठे आर्थिक नुकसान झाल्याचा रोष त्याच्या मनात घर करून होता. त्याशिवाय, टुटुकुमारच्या एका मित्राचे आरोपीच्या बहिणीसोबत प्रेमसंबंध जुळले होते आणि त्यांनी काही फोटो सोशल मीडियावर सार्वजनिक केले होते, ज्याचा प्रचंड राग आरोपीच्या मनात खदखदत होता. याच वैमनस्यातून आणि दुहेरी रागाच्या भरात तिघा नराधमांनी एकत्र येऊन टुटुकुमारचा गळा आवळून संपवले आणि पुरावा संपूर्णपणे नष्ट करण्याच्या हेतूने त्याचा मृतदेह तलावाच्या पाण्यात फेकून पोबारा केला होता.
या गंभीर गुन्ह्यामध्ये पोलिसांनी पुष्करकुमार अरुण यादव (वय 20, रा. बिहार, सध्या रा. सणसवाडी), आयुष्मान सुशील पांडे (वय 20, रा. बिहार, सध्या रा. शिक्रापूर) आणि सचिन मारुती हिंगेवर (वय 20, रा. नांदेड, सध्या रा. सणसवाडी) या तिन्ही हल्लेखोरांना बेड्या ठोकल्या आहेत.
