दिल्ली: दिल्लीतील जंतरमंतर येथे सुरू असलेल्या विद्यार्थ्यांच्या आंदोलनाला पाठिंबा दर्शवण्यासाठी आणि २० जुलै रोजी झालेल्या पोलिस कारवाईच्या निषेधार्थ बुधवारी मुंबईत मोठ्या प्रमाणावर विद्यार्थी, युवक आणि विविध सामाजिक तसेच विद्यार्थी संघटनांचे कार्यकर्ते रस्त्यावर उतरले. दादर येथील शिवाजी पार्क आणि चेंबूरमधील डॉ. बाबासाहेब आंबेडकर उद्यान परिसरात शेकडो आंदोलनकर्ते एकत्र आले होते. मुसळधार पाऊस सुरू असतानाही आंदोलनकर्त्यांनी शांततापूर्ण मार्ग स्वीकारत हातात निषेधाचे फलक, गुलाबाची फुले आणि चॉकलेट्स घेऊन सरकार व पोलिस प्रशासनाविरोधात आपला निषेध व्यक्त केला.
मुंबईत जमावबंदीचे आदेश लागू असतानाही आंदोलनात मोठ्या संख्येने तरुण सहभागी झाल्याने पोलिसांनी परिसरात कडेकोट बंदोबस्त ठेवला होता. काही ठिकाणी आंदोलकांना रोखण्याचा प्रयत्न करण्यात आला, तर काही विद्यार्थ्यांना ताब्यातही घेण्यात आले. या कारवाईदरम्यान घडलेल्या एका घटनेचा व्हिडिओ सोशल मीडियावर व्हायरल झाल्यानंतर या आंदोलनाला वेगळेच वळण मिळाले आहे.
पाहा व्हिडीओ:
View this post on Instagram
व्हायरल झालेल्या व्हिडिओमध्ये दोन विद्यार्थ्यांना पोलिस व्हॅनमध्ये बसवण्यात आल्याचे दिसते. त्यानंतर एका पोलीस कर्मचाऱ्याने विद्यार्थ्यांशी कठोर भाषेत संवाद साधत त्यांना पुन्हा आंदोलनात सहभागी झाल्यास गंभीर परिणाम भोगावे लागतील, अशी कथित धमकी दिल्याचा दावा केला जात आहे. विद्यार्थ्यांनी हा संपूर्ण प्रकार मोबाईलमध्ये गुप्तपणे रेकॉर्ड केल्याचेही सांगितले जात आहे.
या व्हिडिओमध्ये संबंधित पोलीस कर्मचारी विद्यार्थ्यांना खोट्या गुन्ह्यात अडकवण्याची आणि त्यांच्या खिशात अमली पदार्थ ठेवल्याचा बनाव करून कठोर कारवाई करण्याची धमकी देत असल्याचा आरोप करण्यात आला आहे. हा व्हिडिओ सोशल मीडियावर मोठ्या प्रमाणात व्हायरल झाल्यानंतर नागरिकांकडून संताप व्यक्त केला जात असून, या प्रकरणाची निष्पक्ष चौकशी करून संबंधितांवर योग्य कारवाई करण्याची मागणी जोर धरू लागली आहे.
