बीड : परळी तालुक्यातील दहिफळे कुटुंबात तब्बल चार पिढ्यांनंतर मुलीचा जन्म झाल्याने घरात आनंदाचे वातावरण निर्माण झाले आहे. अनेक वर्षांनंतर घरात लेकीचे आगमन झाल्याने कुटुंबीयांनी तिचे अनोख्या पद्धतीने स्वागत केले. नवजात मुलीला रथातून घरी आणत ढोल-ताशांच्या गजरात मिरवणूक काढण्यात आली.
दहिफळे कुटुंबात गेल्या चार पिढ्यांपासून मुलीचा जन्म झालेला नव्हता. त्यामुळे पाचव्या पिढीत मुलगी जन्माला आल्यानंतर कुटुंबीयांचा आनंद गगनात मावेनासा झाला. या आनंदाच्या क्षणी मुलीचे आजोबा भावूक झाले. आपल्या घरात अनेक वर्षांनंतर लेकीचे पाऊल पडल्याचे सांगताना त्यांच्या डोळ्यांत अश्रू आले.
आजोबांनी नवजात मुलीला फुलासारखे जपण्याचा निर्धार व्यक्त केला. घरात मुलगी असणे ही आनंदाची आणि भाग्याची गोष्ट असल्याचे त्यांनी सांगितले. मुलगी झाल्यामुळे कुटुंबाला वेगळाच आनंद मिळाला असून तिचे प्रेम आणि संगोपन प्रेमाने करणार असल्याचेही त्यांनी स्पष्ट केले.
दरम्यान, दवाखान्यातून मुलीला घरी आणताना मिरवणूक काढण्याचा निर्णय कुटुंबीयांनी घेतला. त्यानुसार ढोल-ताशांच्या निनादात रथ सजवून नवजात मुलीला घरी आणण्यात आले. कुटुंबीयांनी या चिमुकलीचे नाव गार्गी ठेवण्याचे ठरवले आहे.
मुलीचे वडीलही या आगमनामुळे आनंदी आहेत. मुलगी वडिलांच्या अधिक जवळची असते, त्यामुळे आपल्याला मुलगीच व्हावी अशी इच्छा होती, असे त्यांनी सांगितले.
सामाजिक कार्यकर्ते अनंत इंगळे यांनीही या उपक्रमाचे कौतुक केले. आजही काही ठिकाणी मुलगी नको अशी मानसिकता दिसून येते. मात्र दहिफळे कुटुंबाने लेकीच्या जन्माचा उत्सव साजरा करून समाजासमोर सकारात्मक उदाहरण ठेवले आहे, असे त्यांनी सांगितले.
