न्हावरे: कर्जाच्या पैशांची परतफेड न झाल्यामुळे कापड दुकानदार महिलेचा विनयभंग करण्यात आला. तसेच महिलेच्या पतीला मारण्याची धमकी दिल्याप्रकरणी शिरूर पोलिसांनी वडगाव रासाई (ता.शिरूर) येथील तिघांविरुद्ध गुन्हा दाखल केला आहे. ही घटना शिरूर तालुक्यातील मांडवगण फराटा येथे घडली आहे.
याप्रकरणी पीडित महिलेने भाऊसाहेब दामोदर वाबळे, जया भाऊसाहेब वाबळे आणि प्रेम ऊर्फ भैय्या भाऊसाहेब वाबळे सर्व जण (रा.वडगाव रासाई, ता.शिरूर, जि.पुणे) यांच्याविरुद्ध शिरूर पोलीस ठाण्यात फिर्याद दाखल केली आहे.
शिरूर पोलिसांनी दिलेल्या माहितीनुसार, ३ जुलै २०२६ रोजी सकाळी साडेनऊ वाजण्याच्या सुमारास मांडवगण फराटा येथे पीडित महिलेच्या कपड्याच्या दुकानात भाऊसाहेब वाबळे, जया वाबळे व प्रेम उर्फ भैय्या वाबळे हे आले.त्यानंतर भाऊसाहेब बावळे व त्यांचा मुलगा प्रेम ऊर्फ भैय्या बावळे यांनी पीडित महिलेच्या पतीने सन २०१४ मध्ये व्याजाने सात लाख रुपये घेतलेल्या पैशांच्या व्यवहाराचा विषय काढला.
काही रक्कम पीडित महिलेच्या पतीने व्याजासह परत केली होती. परंतु,भाऊसाहेब वाबळे यांनी पीडित महिलेच्या पतीला पुन्हा पैशांची मागणी केली. याचवेळी दुकानातील व्यवहारावरून वाद घालून भाऊसाहेब वाबळे, जया वाबळे आणि प्रेम वाबळे यांनी पीडित महिला व तिच्या पतीला दमदाटी केली तसेच याप्रसंगी प्रेम ऊर्फ भैय्या याने पीडित महिलेचा हात पकडून त्यांच्या मनास लज्जा उत्पन्न होईल असे कृत्य केले, असल्याचा आरोप पीडित महिलेने केला आहे.
त्यानंतर पैसे न दिल्यास पीडित महिलेचे दुकान पेटून देण्याची धमकी वाबळे यांच्याकडून देण्यात आली. तसेच पीडीतेच्या पतीस जीवे मारण्याचीही धमकी दिल्याचे फिर्यादीत नमूद करण्यात आले आहे.
या प्रकरणी शिरूर पोलिसांनी विनयभंग,धमकी तसेच महाराष्ट्र सावकारी अधिनियम कायद्या अंतर्गत भाऊसाहेब दामोदर वाबळे, जया भाऊसाहेब वाबळे आणि प्रेम ऊर्फ भैय्या भाऊसाहेब वाबळे या तिघांविरुद्ध गुन्हा दाखल केला आहे. मात्र, अद्याप पर्यंत आरोपींना अटक झाली नसल्याची माहिती समोर आली आहे.
