पुणे : कात्रज-कोंढवा रस्त्याच्या 50 मीटर रुंदीकरणाचे काम मार्च 2027 अखेर पूर्ण करण्याचे लक्ष्य पुणे महापालिकेने निश्चित केले आहे. या प्रकल्पाची निविदा 2017 मध्ये काढण्यात आली होती. मात्र, भूसंपादन, विविध परवानग्या आणि इतर अडचणींमुळे गेल्या अनेक वर्षांपासून या प्रकल्पाचे काम रखडले होते. आता भूसंपादनाचा प्रमुख अडथळा दूर करून प्रकल्पाला गती देण्याचा निर्णय महापालिका प्रशासनाने घेतला आहे.
महापालिका आयुक्त नवलकिशोर राम यांनी संबंधित जागामालकांशी थेट संवाद साधून आवश्यक जागा ताब्यात घेण्याची प्रक्रिया वेगाने पूर्ण करण्याचे निर्देश अधिकाऱ्यांना दिले आहेत. एका महिन्याच्या आत आवश्यक जागा ताब्यात घेण्याचे नियोजन करण्यात आले आहे. तसेच कात्रज-कोंढवा रस्त्याचे प्रस्तावित 84 मीटर रुंदीकरण मार्च 2028 पर्यंत पूर्ण करण्याचे लक्ष्य ठेवण्यात आले आहे.
दक्षिण पुण्यातील वाहतूक कोंडी कमी करण्यासाठी कात्रज चौकातील उड्डाणपूल डिसेंबर 2026 अखेर वाहतुकीसाठी खुला करण्याचे नियोजनही महापालिकेने केले आहे. कात्रज-कोंढवा रस्त्याचे रुंदीकरण अनेक वर्षांपासून रखडल्याने या मार्गावर मोठ्या प्रमाणात वाहतूक कोंडी होत आहे. तसेच या रस्त्यावर अपघातांचे प्रमाण वाढत असल्याने प्रकल्पाचे काम तातडीने पूर्ण करण्याची मागणी होत आहे.
या पार्श्वभूमीवर महापालिका आयुक्त नवलकिशोर राम, आमदार योगेश टिळेकर आणि सभागृह नेते गणेश बीडकर यांनी वरिष्ठ अधिकाऱ्यांसह रस्त्याची पाहणी केली. यावेळी पथ विभागाचे मुख्य अभियंता राजेश बनकर, उपायुक्त निखिल मोरे, विद्युत विभागाच्या मुख्य अभियंता मनीषा शेकटकर, विशेष भूसंपादन कार्यालय आणि राष्ट्रीय महामार्ग विभागाचे अधिकारी उपस्थित होते.
2017 मध्ये निविदा काढल्यानंतर भूसंपादन, परवानग्या आणि प्रत्यक्ष कामातील अडथळ्यांमुळे प्रकल्पाची गती मंदावली होती. गेल्या वर्षभरात महापालिकेने भूसंपादनासाठी पाठपुरावा वाढवला असून आता उर्वरित कामे वेगाने पूर्ण करण्यावर प्रशासनाचा भर आहे.
