पुणे : बावधन बुद्रुक येथील वडिलोपार्जित जमीन विकसित करून जमीनमालकाच्या वाट्याला आलेले तीन फ्लॅट विकल्यानंतर, विक्रीतून मिळालेली तब्बल 2 कोटी 64 लाख 80 हजार 650 रुपयांची रक्कम न देता फसवणूक केल्याच्या आरोपावरून कोथरूड पोलिसांनी एका प्रसिद्ध बांधकाम व्यावसायिक दाम्पत्याविरोधात गुन्हा दाखल केला आहे.
याप्रकरणी तुषार गणपत दगडे यांनी दिलेल्या फिर्यादीवरून विकासक रुपेश हरिभाऊ कुंबरे आणि कांचन रुपेश कुंबरे यांच्याविरोधात 1 ऑगस्ट 2026 रोजी कोथरूड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, दगडे कुटुंबीयांच्या बावधन बुद्रुक येथील वडिलोपार्जित जमिनीच्या विकासासाठी 2011 मध्ये संबंधित विकासक कंपनीसोबत अधिकृत करार करण्यात आला होता. या जागेवर उभारण्यात आलेल्या ‘आर. के. ग्रेसिया’ या गृहप्रकल्पातील काही फ्लॅट कराराप्रमाणे जमीनमालकांच्या वाट्याला आले होते. हे फ्लॅट बाजारात चांगल्या आणि अधिक दराने विकून देण्याचे आश्वासन देऊन विकासकांनी जमीनमालकांकडून कुलमुखत्यारपत्र लिहून घेतले होते.
फिर्यादी तुषार दगडे यांच्या म्हणण्यानुसार, त्यांच्या एकत्रित हिस्स्यातील फ्लॅट क्रमांक ३०१, ९०२ आणि ११०२ यांची विक्री करून विकासकांनी एकूण ५ कोटी २९ लाख ६१ हजार ३०० रुपये प्राप्त केले. मात्र, या व्यवहारातील त्यांच्या स्वतःच्या वाट्याची २ कोटी ६४ लाख ८० हजार ६५० रुपयांची रक्कम विकासकांनी त्यांना दिलीच नाही.
जेव्हा फिर्यादींनी आपल्या हक्काच्या रकमेची वारंवार मागणी केली, तेव्हा आरोपींनी पैसे देण्यास टाळाटाळ केली. एवढेच नव्हे तर, पैसे मागितल्यास जीवे मारण्याची आणि खोट्या गुन्ह्यात अडकविण्याची धमकी दिल्याचेही फिर्यादीत नमूद करण्यात आले आहे. हा सर्व कथित प्रकार २०११ ते १२ मार्च २०२६ या कालावधीत घडला आहे.
दरम्यान, याप्रकरणी कोथरूड पोलिसांनी आरोपी रुपेश कुंबरे आणि कांचन कुंबरे यांच्याविरोधात भारतीय न्याय संहितेच्या (BNS) कलम ३१६(२), ३१६(५), ३५१(२), ३१८(४),३(५) अन्वये गुन्हा नोंदवला आहे. सदर प्रकरणाचा पुढील सखोल तपास कोथरूड पोलीस ठाण्याचे पोलीस उपनिरीक्षक रवींद्र एकनाथ आळेकर करत आहेत.
