पुणे: पुण्यातील बुधवार पेठेत २०१७ मध्ये घडलेल्या तरुणीच्या निर्घृण हत्येप्रकरणी तब्बल नऊ वर्षांनंतर न्यायालयाने महत्त्वपूर्ण निकाल दिला आहे. देहविक्रयाचा व्यवसाय करणाऱ्या २२ वर्षीय तरुणीची चाकूने हत्या करणाऱ्या तिच्या प्रियकराला पुणे सत्र न्यायालयाने जन्मठेपेची शिक्षा सुनावली आहे. तसेच दोषी आरोपीला ५० हजार रुपयांचा दंडही ठोठावण्यात आला आहे. या खटल्यात आरोपीला पकडताना जखमी झालेल्या पोलिस अंमलदाराची साक्ष आणि प्रत्यक्षदर्शी साक्षीदारांचे जबाब निर्णायक ठरले.
अतिरिक्त सत्र न्यायाधीश रजनी क्षीरसागर यांनी हा निकाल दिला. सुखदेव रामदास मडावी (वय ३४, मूळ रा. यवतमाळ, सध्या रा. वडरवाडी, पुणे) याला न्यायालयाने दोषी ठरवले. संबंध तोडल्याच्या रागातून त्याने आपल्या प्रेयसीची हत्या केल्याचे न्यायालयात सिद्ध झाले.
ही घटना २३ मे २०१७ रोजी रात्री बुधवार पेठेतील जनता बिल्डिंग आणि फूड प्लाझा हॉटेल परिसरात घडली होती. संबंधित तरुणी बुधवार पेठेत देहविक्रयाचा व्यवसाय करत होती. आरोपी सुखदेव मडावी आणि तिच्यात प्रेमसंबंध होते. मात्र काही कारणांवरून दोघांमध्ये वाद झाला. या वादातून संतप्त झालेल्या आरोपीने तरुणीच्या छातीवर आणि पोटावर चाकूने सपासप वार केले. गंभीर जखमी झालेल्या तरुणीचा उपचारापूर्वीच मृत्यू झाला.
घटना घडताच परिसरात गस्त घालणारे फरासखाना पोलीस ठाण्याचे तत्कालीन अंमलदार सुहास साळुंखे घटनास्थळी पोहोचले. त्यांनी आरोपीला पकडण्याचा प्रयत्न केला असता चाकू हिसकावून घेताना त्यांच्या हाताच्या बोटांना दुखापत झाली. पळून जाण्याच्या प्रयत्नात आरोपी पायऱ्यांवरून घसरून पडला आणि पोलिसांनी दुसऱ्या कर्मचाऱ्याच्या मदतीने त्याला ताब्यात घेतले.
या प्रकरणात अतिरिक्त सरकारी वकील नामदेव तरळगट्टी आणि अमित देवतरसे यांनी सरकारी पक्षाची बाजू मांडली. खटल्यादरम्यान एकूण १४ साक्षीदारांची साक्ष नोंदवण्यात आली. आरोपीला पकडणारे पोलीस, प्रत्यक्षदर्शी साक्षीदार आणि वैद्यकीय अधिकाऱ्यांच्या साक्षींसह सादर करण्यात आलेले पुरावे न्यायालयाने ग्राह्य धरले. बचाव पक्षाने आरोपीला खोट्या प्रकरणात अडकवल्याचा दावा केला होता. मात्र, उपलब्ध पुरावे आणि सरकारी पक्षाचा युक्तिवाद ग्राह्य धरत न्यायालयाने आरोपीला जन्मठेप आणि ५० हजार रुपयांचा दंडाची शिक्षा सुनावली.
