फुरसुंगी : दिवे घाटातील रस्त्याच्या खोदाई व कटिंगच्या कामावरून दोन ठेकेदारांमध्ये वाद उफाळून आला असून, एका ठेकेदाराला मारहाण करून जबरदस्तीने चारचाकी गाडीत बसवून नेल्याचा धक्कादायक प्रकार शनिवारी (ता. २) रात्री नऊ वाजण्याच्या सुमारास समोर आला आहे. याप्रकरणी फुरसुंगी पोलीस ठाण्यात दोन जणांसह पाच ते सहा अनोळखी व्यक्तींविरुद्ध गुन्हा दाखल करण्यात आला आहे.
अमित तावरे, शिवराज तावरे आणि त्यांच्यासोबत असलेल्या पाच ते सहा अनोळखी व्यक्तींविरुद्ध गुन्हा दाखल करण्यात आला आहे. याप्रकरणी ज्ञानेश्वर नारायण भोसले (वय ५३, रा. चंदननगर, पुणे) यांनी फुरसुंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी ज्ञानेश्वर भोसले यांची ईश्वर डेव्हलपर्स नावाची सिव्हिल कंत्राटदार कंपनी असून, रस्त्यांची खोदाई व रोड कटिंगची कामे करते. एप्रिल २०२५ मध्ये त्यांच्या कंपनीने दिवे घाटातील रस्त्याच्या खोदाईचे काम आर अँड सी कंपनीकडून घेतले होते. या प्रकल्पातील विविध टप्प्यांची कामे अनेक कंत्राटदारांना देण्यात आली होती.
दरम्यान, सेल्फी पॉईंटसमोरील काम पूर्वी कंत्राटदार सुजित झेंडे यांच्याकडे होते. त्यांनी ते काम काही कारणास्तव थांबविल्यानंतर आर.अँड.सी कंपनीच्या अधिकाऱ्यांच्या संमतीने ते काम ज्ञानेश्वर भोसले यांनी सुरू केले होते. शनिवारी (ता. २) दिवसभर काम सुरू असताना दुसरे कंत्राटदार अमित तावरे यांच्या कामगारांकडून त्याच ठिकाणी काम सुरू असल्याचे निदर्शनास आले. त्यावरून दोन्ही बाजूंमध्ये वाद निर्माण झाला. आर.अँड. सी कंपनीच्या अधिकाऱ्यांनी दूरध्वनीद्वारे दोन्ही पक्षांना काम थांबविण्याचे सांगून दुसऱ्या दिवशी प्रत्यक्ष पाहणी करून निर्णय घेण्याचे आश्वासन दिले.
मात्र, त्याच रात्री सुमारे ९ वाजण्याच्या सुमारास अमित तावरे, त्यांचा मुलगा शिवराज तावरे आणि त्यांच्यासोबत पाच ते सहा जण सेल्फी पॉईंटजवळील कामाच्या ठिकाणी आले. त्यांनी “आमचे काम का बंद केले?” असा जाब विचारत फिर्यादीला शिवीगाळ करून मारहाण केल्याचा आरोप करण्यात आला आहे. त्यानंतर संबंधितांनी ज्ञानेश्वर भोसले यांना जबरदस्तीने चारचाकी गाडीत बसवून त्यांच्यावर मारहाण केली. तसेच गाडीतून बाहेर पडण्यासही मज्जाव केला. त्यानंतर त्यांना पोलीस ठाण्यात आणण्यात आले. पोलिसांनी वैद्यकीय तपासणीसाठी पाठविल्यानंतर त्यांनी उपचार घेत फुरसुंगी पोलीस ठाण्यात तक्रार दाखल केली.
या प्रकरणी फुरसुंगी पोलिसांनी अमित तावरे, शिवराज तावरे आणि त्यांच्या साथीदारांविरुद्ध मारहाण, शिवीगाळ, बेकायदेशीरपणे अडवून ठेवणे व अन्य संबंधित कलमान्वये गुन्हा दाखल केला असून, पुढील तपास सुरू आहे.
