लोणी काळभोर, ता. ४ : कामावरून मध्यरात्री घरी परतणाऱ्या एका मजुराला रस्त्यात अडवून “मला ओळखतो का?” असा जाब विचारत लाकडी दांडक्याने डोक्यावर वार करून मारहाण केल्याची धक्कादायक घटना फुरसुंगी (ता.हवेली) परिसरात सोमवारी (ता. 4) घडली. या प्रकरणी एका संशयितासह दोन अनोळखी व्यक्तींविरुद्ध फुरसुंगी पोलीस ठाण्यात गुन्हा दाखल करण्यात आला आहे.
याप्रकरणी विलास सुदाम गिरी (वय 53, रा. चंदवाडी, जुना कॅनालजवळ, फुरसुंगी, ता. हवेली) यांनी फिर्याद दिली आहे. त्यानुसार विशाल राजू शिंदे (वय 35, रा. चंदवाडी, जुना कॅनालजवळ, फुरसुंगी) आणि त्याच्यासोबत असलेल्या दोन अनोळखी व्यक्तींविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, विलास गिरी हे फुरसुंगी येथील एका मशिनरी पार्ट्सच्या गोदामात मागील वर्षभरापासून काम करतात. सोमवारी (ता. ४) मध्यरात्री सुमारे १२.१० वाजण्याच्या सुमारास ते दुचाकीवरून कामावरून घरी परतत असताना चंदवाडी येथील जुन्या कॅनालजवळील सार्वजनिक रस्त्यावर त्यांच्या दुचाकीसमोर विशाल शिंदे आडवा आला.
विशाल शिंदे आणि त्याच्यासोबतचे दोघेही मद्यधुंद अवस्थेत होते. विशालने “मला ओळखतो का?” अशी विचारणा केली. त्यावर “तू आमच्याच वस्तीमध्ये राहतोस, मला घरी जायला उशीर होतोय, मला जाऊ दे,” असे विलास गिरी यांनी सांगितले. मात्र, त्यानंतर विशाल शिंदे याने संतापाच्या भरात जवळ पडलेला लाकडी दांडका उचलून त्यांच्या डोक्यावर जोरदार वार केला.
याचवेळी त्याच्यासोबत असलेल्या दोन अनोळखी व्यक्तींनीही फिर्यादीला हाताने मारहाण करत शिवीगाळ केली. तसेच जीवे मारण्याची धमकी दिल्याचा आरोप तक्रारीत करण्यात आला आहे. या हल्ल्यानंतर जखमी विलास गिरी यांना संतोष ढोरे आणि विनायक कामठे यांनी तातडीने भेकराईनगर येथील हरपळे डॉक्टरांकडे उपचारासाठी नेले. प्राथमिक उपचारानंतर त्यांना पुढील उपचारासाठी ससून रुग्णालयात दाखल करण्यात आले. प्रकृतीत सुधारणा झाल्यानंतर त्यांनी फुरसुंगी पोलीस ठाण्यात तक्रार दाखल केली.
दरम्यान, फुरसुंगी पोलिसांनी विशाल राजू शिंदे व त्याच्या दोन अनोळखी साथीदारांविरुद्ध मारहाण, शिवीगाळ, जीवे मारण्याची धमकी तसेच अन्य संबंधित कलमान्वये गुन्हा दाखल केला असून, पुढील तपास सुरू आहे.
