लोणी काळभोर, ता. २६ : लग्नानंतर सातत्याने नोकरी करण्यासाठी दबाव, माहेराहून दहा लाख रुपये आणण्याची मागणी, शारीरिक व मानसिक छळ, तसेच बेल्ट व क्रिकेटच्या बॅटने मारहाण करून घराबाहेर काढल्याचा गंभीर आरोप एका विवाहितेने आपल्या पतीवर केला आहे. या प्रकरणी लोणी काळभोर पोलिस ठाण्यात एकावर भारतीय न्याय संहिता (बीएनएस) अंतर्गत गुन्हा दाखल करण्यात आला आहे.
प्रशांत बन्सीलाल महाजन (रा. सोनगीर, जि. धुळे) असे गुन्हा दाखल करण्यात आलेल्याचे नाव आहे. पोलिसांनी दिलेल्या माहितीनुसार, पिडीता या 33 वर्षाच्या असून त्यांचा विवाह ३ डिसेंबर २०१७ रोजी प्रशांत महाजन यांच्यासोबत हिंदू रीतीरिवाजाप्रमाणे झाला होता. विवाहानंतर सुरुवातीचे काही महिने संसार सुरळीत सुरू होता. त्यानंतर पतीने नोकरी करून पगार घरी आणण्याचा दबाव टाकण्यास सुरुवात केली. तसेच, “मी तुला एकटा सांभाळू शकत नाही,” असे सांगून वारंवार माहेराहून पैसे आणण्याची मागणी केली जात होती.
फिर्यादी तीन महिन्यांच्या गरोदर असतानाही मारहाण व शिवीगाळ करण्यात आल्याचा आरोप तक्रारीत करण्यात आला आहे. मुलीच्या जन्मानंतरही छळ सुरूच राहिला. किरकोळ कारणांवरून वाद घालणे, आई-वडिलांचा अपमान करणे आणि पुन्हा संसार करायचा असेल तर सासूसमोर माफी मागण्याची अट घालण्यात आली होती. त्यानंतर पतीची बदली बडोदा येथे झाल्यानंतरही तेथेही आर्थिक कारणांवरून सतत मानसिक व शारीरिक त्रास दिला आहे. तर सन २०२१ मध्ये पुण्यात आल्यानंतरही पतीकडून नोकरी करण्यासाठी दबाव टाकण्यात आला. तसेच, माहेराहून दहा लाख रुपये आणण्याची मागणी करत घराबाहेर काढण्यात आले. तसेच लग्नातील सोन्याचे दागिने, साड्या व इतर साहित्यही पतीकडेच ठेवण्यात आले आहे.
दरम्यान, पिडीता या लोणी काळभोर येथे वास्तव्यास असताना पतीने आर्थिक अडचणीचे कारण सांगून तिचे सुमारे साडेसहा तोळे सोने तसेच मुलीचे दोन तोळे सोन्याचे दागिने घेतले. शिवाय तिच्या नावावर दहा लाख रुपयांचे कर्ज काढून त्याचा वापर स्वतः केला आणि कर्जफेडीची जबाबदारी त्यांच्यावरच टाकण्यात आली आहे. याच काळात पतीकडून वारंवार क्रिकेटच्या बॅटने व बेल्टने मारहाण केली जात होती. अनेकदा मध्यरात्री घराबाहेर काढून रात्रभर बाहेर बसण्यास भाग पाडले जात असल्याचेही तक्रारीत नमूद करण्यात आले आहे.
अखेर २ ऑगस्ट २०२५ रोजी पतीने कायमचे माहेरी पाठवून दिल्याने पीडिता यांना लोणी काळभोर पोलीस ठाण्यातधाव घेतली. आणि पतीच्या विरोधात तक्रार दिली. त्यानुसार लोणी काळभोर पोलिसांनी पती प्रशांत महाजन यांच्याविरुद्ध भारतीय न्याय संहिता (बीएनएस) २०२३ मधील कलम ११५(२), ३५१(२), ३५१(३), ३५२ आणि ८५ अन्वये गुन्हा दाखल केला असून पुढील तपास सुरू आहे.
