पुणे : पुणे येथील केतन अग्रवाल हत्या प्रकरणाला आता एक नवीन आणि धक्कादायक वळण मिळाले आहे. या प्रकरणातील मुख्य आरोपी सिया गोयल आणि तिचा प्रियकर चेतन चौधरी यांचा एक रोमँटिक व्हिडिओ सोशल मीडियावर मोठ्या प्रमाणावर व्हायरल झाला आहे. मिळालेल्या माहितीनुसार, हा व्हिडिओ 23 मे रोजी रात्री 9.30 च्या सुमारास पोस्ट करण्यात आला होता.केतनच्या हत्येच्या अवघ्या 3 आठवडे आधी दोघे एकमेकांना भेटले होते.
पुण्यातील केतन अग्रवाल या तरुणाची 18 जून रोजी लोहगडावरून ढकलून हत्या करण्यात आली होती. या गुन्ह्यात सिया आणि चेतन दोघांनाही पोलिसांनी अटक केली असून, या प्रकरणाचा पुढील तपास पोलीस करत आहेत.मात्र हत्येच्या 3 आठवडापूर्वी सिया गोयल आणि चेतन एकमेकांना भेटले होते. त्यांचा एक व्हिडीओ व्हायरल होत आहे.ज्यामध्ये दोघेही एकमेकांच्या अगदी जवळ दिसत आहेत.
फेब्रुवारी महिन्यात सियाचा साखरपुडा केतन अग्रवालसोबत झाला होता. असे असतानाही ती चेतनच्या संपर्कात होती आणि त्यांच्यात प्रेमसंबंध सुरू होते, या दाव्याला आता या नवीन व्हिडिओमुळे बळ मिळाले आहे. सिया आणि चेतनाच्या या व्हिडिओमध्ये दोघेही एकमेकांचा हात हातात घेऊन मिठी मारताना दिसत आहेत. यावर सियाच्या कुटुंबीयांनी कोणतीही प्रतिक्रिया देण्यास स्पष्ट नकार दिला आहे.
दुसरीकडे, सियाच्या आईने यापूर्वी एका मुलाखतीत सांगितले होते की, चेतन आणि सियामध्ये फक्त मैत्री होती. साखरपुड्यानंतर सियाने कधीही केतनला टाळले नाही, त्यामुळे त्यांच्यात प्रेमसंबंध असतील अशी शंका कधी आली नाही. मात्र, आता समोर आलेले फोटो आणि व्हिडिओ त्यांच्या कुटुंबाच्या दाव्यावर प्रश्नचिन्ह निर्माण करत आहेत.
या संपूर्ण प्रकरणावर बोलताना सियाच्या वडिलांनी आपली रोखठोक भूमिका मांडली आहे. “आमची मुलगी असे काही करेल असे आम्हाला कधीच वाटले नव्हते. पण जर कोर्टात ती दोषी सिद्ध झाली, तर तिने आपली शिक्षा भोगायलाच हवी. ती दोषी असेल तर तिला फाशीची शिक्षा झाली तरी आमची काहीही हरकत नाही,” असे तिच्या वडिलांनी म्हटले आहे.
