पुणे: गणेशोत्सवाच्या काळात शहरातील प्रसिद्ध गणेश मंडळांचे देखावे पाहण्यासाठी नागरिक मोठ्या संख्येने मध्यवर्ती पुण्यात येत आहेत. वाढणारी गर्दी आणि वाहतुकीचा ताण लक्षात घेऊन पुणे वाहतूक पोलिसांनी काही महत्त्वाच्या रस्त्यांवर तात्पुरते निर्बंध लागू केले आहेत.
18 सप्टेंबर ते 25 सप्टेंबर या कालावधीत दररोज सायंकाळी 5 वाजल्यापासून गर्दी कमी होईपर्यंत काही प्रमुख मार्गांवर सामान्य वाहनांना प्रवेश दिला जाणार नाही. कार, दुचाकी आणि रिक्षांसह इतर वाहनांनाही या निर्बंधांचा सामना करावा लागणार आहे. मात्र रुग्णवाहिका, अग्निशमन वाहने आणि पोलिसांची अत्यावश्यक वाहने यांना या नियमातून वगळण्यात आले आहे.
लक्ष्मी रस्त्यावरील काही भागातही संध्याकाळनंतर वाहनांची ये-जा थांबवण्यात येणार आहे. हमजेखान चौक ते सेवासदन चौक तसेच सेवासदन चौक ते टिळक चौक या मार्गांवर निर्बंध राहतील. या परिसरातून जाणाऱ्या वाहनचालकांनी डुल्या मारुती चौक किंवा दारूवाला पूल या पर्यायी मार्गांचा विचार करावा.
बाजीराव रस्त्यावर पुरम चौक ते अप्पा बळवंत चौक या दरम्यान वाहतूक बंद ठेवण्यात येणार आहे. या मार्गाऐवजी पुरम चौकातून टिळक रस्ता आणि पुढे केळकर रस्त्याचा वापर करता येईल. काही ठिकाणी एकेरी वाहतुकीच्या नियमातही तात्पुरते बदल करण्यात आले आहेत.
शिवाजी रस्त्यावर गाडगीळ पुतळा ते रामेश्वर चौक या भागातही वाहनांना प्रवेश राहणार नाही. त्यामुळे वाहनचालकांनी प्रवास सुरू करण्यापूर्वी पर्यायी रस्त्यांची माहिती घेणे महत्त्वाचे ठरणार आहे.
शिवाजीनगरहून स्वारगेटच्या दिशेने जाणाऱ्यांसाठीही वाहतूक पोलिसांनी पर्यायी मार्ग निश्चित केले आहेत. स. गो. बर्वे चौक, जंगली महाराज रस्ता, टिळक चौक आणि टिळक रस्त्याच्या मार्गाने जाता येईल. दुसऱ्या पर्यायात सिमला ऑफिस चौक, कामगार पुतळा चौक, शाहीर अमर शेख चौक आणि नेहरू रस्त्याचा वापर करता येणार आहे.
रामेश्वर चौक ते जेधे चौकदरम्यानची वाहतूकही काही प्रमाणात वळवण्यात आली आहे. कुंभारवेस चौक, पवळे चौक, घोरपडे पेठ आणि शंकरशेठ रस्त्याचा पर्यायी मार्ग म्हणून वापर करता येईल. गणेशोत्सवात गर्दी टाळण्यासाठी नागरिकांनी शक्य असल्यास सार्वजनिक वाहतुकीचा वापर करावा आणि वाहतूक पोलिसांच्या सूचनांचे पालन करावे.
