पुणे, ता. १० : पुणे महानगरपालिकेच्या मुख्य इमारतीत बॉम्ब असल्याचा धमकीचा ई-मेल प्राप्त झाल्याने बुधवारी एकच खळबळ उडाली. घटनेची माहिती मिळताच पोलीस यंत्रणा तातडीने घटनास्थळी दाखल झाली असून अधिकारी, कर्मचारी आणि नागरिकांना सुरक्षितरित्या बाहेर काढण्याचे काम युद्धपातळीवर सुरू करण्यात आले आहे.
मिळालेल्या प्राथमिक माहितीनुसार, पुणे महापालिकेला अज्ञात व्यक्तीकडून बॉम्ब असल्याचा ई-मेल पाठविण्यात आला. या संदेशानंतर सुरक्षा यंत्रणा सतर्क झाली असून परिसरात मोठा पोलीस बंदोबस्त तैनात करण्यात आला आहे.
घटनास्थळी पोलीस, बॉम्ब शोधक व नाशक पथक तसेच अन्य सुरक्षा यंत्रणा दाखल झाल्या असून संपूर्ण परिसराची कसून तपासणी सुरू आहे. खबरदारीचा उपाय म्हणून महापालिकेच्या इमारतीतील अधिकारी, कर्मचारी व नागरिकांना बाहेर काढण्यात येत आहे.
दरम्यान, संबंधित धमकीचा ई-मेल नेमका कोणी पाठवला, याचा शोध घेण्यासाठी पोलिसांनी तपास सुरू केला असून सायबर यंत्रणांचीही मदत घेतली जात आहे. या घटनेमुळे महापालिका परिसरात काही काळ तणावाचे वातावरण निर्माण झाले असून तपासानंतरच पुढील माहिती स्पष्ट होणार आहे.
