लोणीकंद, (पुणे): अन्न व औषध प्रशासनाच्या पथकाने प्रतिबंधित गुटखा, पानमसाला आणि सुगंधित तंबाखूची विक्री करणाऱ्या वढू खुर्द येथील दुकानावर धाड टाकून साठा जप्त केला. या कारवाईनंतर दुकान सिलबंद करण्यात आले असून विक्रेत्याविरुद्ध लोणीकंद पोलिस ठाण्यात गुन्हा दाखल करण्यात आला आहे.
लोणीकंद पोलिसांचे कर्मचारी आणि अन्न सुरक्षा विभागाच्या पथकासह एमएच-12 पान शॉप, पॉवर हाऊस, आळंदी रोड, वढू खुर्द येथे सोमवारी (ता. 31) ही कारवाई करण्यात आली आहे. याप्रकरणी विक्रेता लंकेश मच्छिंद्र भोंडवे (वय 27) याच्यावर गुन्हा दाखल करण्यात आला आहे. याबाबत अन्न सुरक्षा अधिकारी सायली शंकर टाव्हरे यांनी लोणीकंद पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, 31 ऑगस्ट रोजी दुपारी 1 वाजता पंच, लोणीकंद पोलिसांचे कर्मचारी आणि अन्न सुरक्षा विभागाच्या पथकासह एमएच-12 पान शॉप, पॉवर हाऊस, आळंदी रोड, वढू खुर्द येथे तपासणी करण्यात आली. तपासणीदरम्यान विक्रेता लंकेश भोंडवे याच्या दुकानात महाराष्ट्र शासनाने प्रतिबंधित केलेला पानमसाला व सुगंधित तंबाखूचा साठा आढळून आला. पथकाने विमल, व्ही-1, रजनीगंधा, RMD, डायरेक्टर स्पेशल आणि गोवा 1000 या ब्रँडचे एकूण 165 पाऊच जप्त केले. जप्त मालाची किंमत 1,690 रुपये असल्याचे नमूद करण्यात आले आहे.
दरम्यान, अधिकाऱ्यांनी साठ्याबाबत खरेदी बिल व पुरवठादाराची माहिती विचारली असता विक्रेत्याने कोणतीही माहिती अथवा कागदपत्रे सादर केली नाहीत. जप्त केलेला संपूर्ण साठा विश्लेषणासाठी पाठविण्यात आला असून पुनर्विक्री होऊ नये म्हणून दुकान सिलबंद करण्यात आले आहे. या प्रकरणी अन्न सुरक्षा व मानदे कायदा 2006 तसेच भारतीय न्याय संहितेतील विविध कलमान्वये गुन्हा दाखल करण्यात आला असून पुरवठादारापर्यंत सखोल तपास सुरू आहे.
