दौंड : बोरीऐंदी गावात घरात घुसून 23 वर्षीय तरुणीला जबरदस्तीने चारचाकी वाहनातून घेऊन गेल्याचा धक्कादायक प्रकार समोर आला आहे. या घटनेप्रकरणी यवत पोलिसांनी साहिल मोहम्मद तांबोळी, मोहम्मद तांबोळी, कैफ शेख आणि अब्दुल शेख यांच्याविरोधात गुन्हा दाखल केला आहे. याप्रकरणी तरुणीच्या वडिलांनी पोलिसांत तक्रार दिली आहे.
तक्रारीनुसार, तरुणी उरुळी कांचन येथील संगणक वर्गाला जात होती. काही काळापूर्वी साहिल तांबोळी आणि त्याचे दोन मित्र तिचा पाठलाग करून त्रास देत असल्याचे तिने कुटुंबीयांना सांगितले होते. त्यानंतर तिच्या वडिलांनी साहिलच्या वडिलांची भेट घेऊन मुलाला समज देण्याची विनंती केली होती. त्यावेळी पुन्हा त्रास होणार नाही, असे आश्वासन मिळाल्याने पोलिसांत तक्रार करण्यात आली नव्हती.
दरम्यान, 30 ऑगस्ट रोजी रात्री साडेदहाच्या सुमारास तरुणी आपल्या वडील आणि भावासोबत घरात होती. त्यावेळी आरोपी घरात जबरदस्तीने शिरल्याचा आरोप आहे. त्यातील दोघांच्या हातात लोखंडी कोयते, तर अन्य दोघांकडे लाकडी काठ्या असल्याचे तक्रारीत नमूद करण्यात आले आहे.
घरात प्रवेश केल्यानंतर आरोपींनी धमकावल्याचा आरोप असून, एका आरोपीने कोयत्याचा धाक दाखवत कपाटातून घरखर्चासाठी ठेवलेली 25,000 रुपयांची रोकड घेतल्याचे तक्रारीत म्हटले आहे. त्यानंतर तरुणीला जबरदस्तीने बाहेर नेऊन कारमध्ये बसवण्यात आल्याचा आरोप आहे.
तरुणीच्या वडिलांनी आणि भावाने विरोध केला असता त्यांना काठ्यांनी मारहाण करून धमकावल्याचेही तक्रारीत नमूद आहे. घटनेनंतर कुटुंबीयांनी परिसरात तरुणीचा शोध घेतला. मात्र ती सापडली नसल्याने अखेर यवत पोलिसांत तक्रार दाखल करण्यात आली. पोलिसांनी संबंधित कलमांनुसार गुन्हा नोंदवून तपास सुरू केला आहे. तरुणीचा शोध घेण्यासाठी पोलिसांकडून पुढील कारवाई केली जात आहे.
