दौंड : राहू परिसरात 11 वीतील अल्पवयीन मुलीला रस्त्यात अडवून तिच्याशी गैरवर्तन केल्याचा आणि चाकूचा धाक दाखवून तिला सोबत नेण्याचा प्रयत्न केल्याचा गंभीर प्रकार समोर आला आहे. या प्रकरणाची माहिती मिळाल्यानंतर मुलीच्या वडिलांनी यवत पोलीस ठाण्यात धाव घेत तक्रार दाखल केली. या प्रकरणी रमजान रसूल शेख (रा. राहू, ता. दौंड, जि. पुणे) आणि त्याच्या एका साथीदाराविरोधात यवत पोलीस ठाण्यात गुन्हा दाखल करण्यात आला आहे.
पोलिसांकडे दाखल तक्रारीनुसार, 2 सप्टेंबर रोजी दुपारच्या सुमारास संबंधित अल्पवयीन मुलगी तिच्या मैत्रिणीसोबत दुचाकीवरून घरी जात होती. कांरडे पिंगळेवस्ती परिसरातील रस्त्याजवळ दोघे संशयित दुचाकीवरून आले आणि त्यांनी मुलींचा मार्ग अडवला.
यावेळी आरोपीने मुलीचा हात पकडून तिला ओढण्याचा प्रयत्न केल्याचे तक्रारीत नमूद करण्यात आले आहे. त्यानंतर चाकू दाखवून धमकी दिल्याचा आरोप आहे. दोन्ही मुलींनी घाबरून आरडाओरड केल्यानंतर संबंधित व्यक्ती तेथून निघून गेल्याचे तक्रारीत म्हटले आहे. तक्रारदाराच्या म्हणण्यानुसार, संबंधित तरुण यापूर्वीही मुलीला त्रास दिला होता. तसेच तो रात्रीच्या वेळी घराजवळ येत असल्याने मुलगी घाबरलेली होती. मात्र, आधी झालेल्या त्रासाची माहिती तिने कुटुंबीयांना दिली नव्हती.
या प्रकरणाची माहिती मिळाल्यानंतर मुलीच्या वडिलांनी तक्रार दाखल केली. दरम्यान, समोर आलेल्या माहितीनुसार, सुमारे चार महिन्यांपूर्वी मुलीच्या वडिलांची रमजान रसूल शेख याच्याशी ओळख झाली होती. काही अडचण निर्माण झाल्यास संपर्क साधता यावा, असे सांगून शेखने त्यांचा मोबाईल काही काळ स्वतःकडे घेतला होता. त्यावेळी त्याने तक्रारदाराचे व्हॉट्सअॅप अकाउंट आपल्या मोबाईलमध्ये सुरू केले होते. त्यानंतर या व्हॉट्सअॅपचा वापर करून मुलीविरुद्ध काही आक्षेपार्ह किंवा चुकीची माहिती त्याने तक्रारदाराच्या जावयाला पाठवल्याचा आरोपही तक्रारीत करण्यात आला आहे.
दरम्यान, दिलेल्या तक्रारीनुसार, भारतीय न्याय संहितेतील संबंधित कलमांसह पॉक्सो कायद्याअंतर्गत गुन्हा नोंदवण्यात आला आहे. पोलिसांनी प्रकरणाचा तपास सुरू केला असून, मुख्य आरोपीसह त्याच्या साथीदाराबाबत अधिक माहिती गोळा केली जात आहे. या घटनेमुळे परिसरात चिंता व्यक्त होत असून, अल्पवयीन मुलीच्या सुरक्षेचा मुद्दा पुन्हा चर्चेत आला आहे.
