पुणे : पुण्यातील व्यावसायिक विशाल अग्रवाल यांनी त्यांचे दिवंगत पुत्र केतन अग्रवाल यांच्या लग्नाच्या खर्चाबाबत सोशल मीडियावर पसरणाऱ्या सर्व अफवांचे पूर्णपणे खंडन केले आहे.लग्नासाठी 17 कोटी रुपये खर्च केल्याच्या आणि प्रायव्हेट जेट बुक केल्याच्या सर्व बातम्या पूर्णपणे चुकीच्या आणि निराधार आहेत असे त्यांनी स्पष्ट सांगितले आहे.
केतन आणि सियाचा फेब्रुवारी 2026 मध्ये साखरपुडा झाला, या वर्षाअखेरीस त्यांचं लग्न होणार होतं. त्यांच्या लग्नासाठी मोठी तयारी करण्यात आली होती, कोट्यवधींचा खर्च करण्यात आला, बरंच सोन खरेदी करण्यात आलं असे अनेक दावे देखील करण्यात आले. मात्र यावर विशाल अग्रवाल यांनी मौन सोडलं आहे. लग्नासाठी कोट्यवधी रुपयांचा खर्च आणि सोन्याची मोठी खरेदी केल्याच्या बातम्या चुकीच्या असल्याचे त्यांनी स्पष्ट केले. उदयपूरमध्ये एका छोट्या हॉटेलचे बुकिंग केले होते आणि त्यासाठी केवळ नाममात्र अॅडव्हान्स रक्कम दिली होती, असे त्यांनी सांगितले.
विशाल अग्रवाल यांनी आरोपींनी कटाचा भाग म्हणून केतनला फसवून लोहगडावर नेले होते, असा गंभीर आरोप केला आहे .विशिष्ट माहितीनुसार, आरोपींनी इन्स्टाग्रामवर ‘माही जे’ या नावाने एक बनावट खाते तयार केले होते. या खात्याद्वारे केतनशी संपर्क साधून सियाला वाढदिवसाचे सरप्राईज द्यायचे आहे, असा बनाव रचण्यात आला. या बहाण्याने त्याला सियाला घेऊन लोहगडावर येण्यास सांगण्यात आले. केतन सियाला घेऊन तिथे पोहोचला आणि आरोपींनी पूर्वनियोजित कट रचून त्याची हत्या केली. सिया आणि चेतन चौधरी हे दोघे मिळून हे फेक अकाऊंट चालवत असल्याचा दावा विशाल अग्रवाल यांनी केला आहे.
याप्रकरणी पोलिसांनी हजारो पानांचे दोषारोपपत्र (चार्जशीट) न्यायालयात सादर केले आहे. तपासादरम्यान केतनच्या बहिणीने, संजनाने दिलेल्या जबाबातूनही अनेक बाबी समोर आल्या आहेत. केतनने त्याच्या भावी पत्नीच्या नावाचा टॅटू हातावर गोंदवला होता, तसेच त्याच्या मोबाईलमध्ये सियाचे इन्स्टाग्राम खाते चालू होते अशी माहिती समोर आली आहे.
