लोणीकंद, ता. 08 : गावच्या यात्रेत झालेल्या किरकोळ वादाच्या (Lonikand News) रागातून दोघांनी एकाला बेदम मारहाण करून ‘विकेट’ टाकण्याची धमकी दिल्याचा प्रकार नुकताच उघडकीस आला आहे. लोणीकंद येथील ‘दुनियादारी हॉटेल’समोर रविवारी (ता. 06) रात्री साडेअकरा वाजण्याच्या सुमारास हि घटना घडली. याप्रकरणी दोघांवर लोणीकंद पोलीस ठाण्यात गुन्हा दाखल करण्यात आला आहे.
सचिन नारायण राखपसरे (वय -32, रा. सहकार नगर, लोणीकंद) असे मारहाण झालेल्या तरुणाचे नाव आहे, तर अनिकेत खंडागळे (वय-23, रा. लोणीकंद), व आदी दोरके (वय -24, रा. वाघोली), अशी मारहाण करणाऱ्या दोघांची नावे आहेत. याप्रकरणी राखपसरे यांनी दिलेल्या तक्रारीनुसार दोघांवर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी सचिन राखपसरे हे पारले कंपनीत माथाडी कामगार म्हणून कार्यरत आहेत. रविवारी रात्री साडे अकरा वाजण्याच्या सुमारास सचिन हे दुनियादारी हॉटेलजवळ थांबले होते. यावेळी त्यांच्या ओळखीचे दोन तरुण दुचाकीवरून तिथे आले. एप्रिल 2025 मध्ये लोणीकंद गावच्या यात्रेत सचिन राखपसरे आणि अनिकेत खंडागळे यांच्यात शाब्दिक वाद झाला होता. त्याच वादाचा राग मनात धरून आरोपींनी सचिन यांच्यावर हल्ला चढवला.
आरोपींनी काहीही न बोलता सचिन यांची कॉलर पकडून शिवीगाळ सुरू केली. यावेळी अनिकेत खंडागळे याने सचिन यांचे दोन्ही हात पाठीमागून घट्ट धरून ठेवले, जेणेकरून त्यांना हालचाल करता येऊ नये. त्याच वेळी त्याचा साथीदार आदी दोरके याने आपल्याकडील एका कठीण वस्तूने (संशयित लोखंडी रॉड किंवा तत्सम वस्तू) सचिन यांच्या तोंडावर उजव्या बाजूला जोरात प्रहार केला. या हल्ल्यात सचिन गंभीर जखमी होऊन रक्ताच्या थारोळ्यात पडले.
मारहाण केल्यानंतर आरोपींनी सचिन यांना “आता तुला एवढ्यावरच सोडतो, तु सुधरून राहा नाहीतर तुझी विकेट टाकीन” अशी धमकी देऊन दुचाकीवरून पळ काढला. या झटापटीत फिर्यादीचा मोबाईलही गहाळ झाला आहे. जखमी सचिन यांनी तातडीने पोलीस स्टेशन गाठले, तिथून त्यांना उपचारासाठी ससून रुग्णालयात पाठवण्यात आले. उपचार पूर्ण झाल्यानंतर त्यांनी रीतसर तक्रार दाखल केली.
दरम्यान, लोणीकंद पोलिसांनी या दोन्ही आरोपींविरुद्ध मारहाण, शिवीगाळ आणि जीवे मारण्याची धमकी दिल्याप्रकरणी कायदेशीर गुन्हा दाखल केला आहे.
