Rise in Gold Prices : जळगाव : अमेरिका आणि इराण यांच्यात जवळपास 40 दिवस चाललेल्या तणावानंतर दोन आठवड्यांसाठी शस्त्रसंधी जाहीर करण्यात आली आहे. या निर्णयामुळे होर्मुझ सामुद्रधुनी खुली होणार असून, जागतिक व्यापारासाठी मोठा दिलासा मिळणार आहे. या घडामोडींचा थेट परिणाम सराफा बाजारावरही दिसून आला आहे.
शस्त्रसंधीची घोषणा होताच सोनं आणि चांदीच्या दरात अचानक मोठी वाढ झाली आहे. काही तासांतच सोन्याच्या दरात सुमारे 3000 रुपयांची वाढ झाली, तर चांदीच्या दरात तब्बल 10000 रुपयांनी उसळी घेतली. त्यामुळे ग्राहक आणि गुंतवणूकदार दोघेही आश्चर्यचकित झाले आहेत.
कालपर्यंत जीएसटीशिवाय सुमारे 147500 रुपये असलेला सोन्याचा दर आता 151500 रुपयांवर पोहोचला आहे. जीएसटीसह हा दर सुमारे 156045 रुपयांपर्यंत गेला आहे. लग्नसराईच्या काळात सोन्याने दीड लाखांचा टप्पा ओलांडल्याने सामान्य नागरिकांच्या खर्चावर मोठा परिणाम होत आहे.
चांदीच्या दरातही मोठी वाढ झाली आहे. मंगळवारी 237000 रुपये असलेली चांदी आता 247000 रुपयांवर पोहोचली आहे. जीएसटीसह चांदीचा दर सुमारे 254410 रुपये झाला आहे. एका दिवसात एवढी मोठी वाढ झाल्याने बाजारात अस्थिरता वाढल्याचे चित्र आहे.
व्यापाऱ्यांच्या मते, युद्धाची भीती कमी झाली असली तरी जागतिक बाजारातील बदल, डॉलरच्या मूल्यातील चढ-उतार आणि गुंतवणुकीची वाढती मागणी यामुळे सोने-चांदीच्या दरात वाढ झाली आहे. येत्या काही दिवसांत दर आणखी वाढू शकतात, असा अंदाज व्यक्त केला जात आहे.
या परिस्थितीत ग्राहकांनी आणि गुंतवणूकदारांनी सावधगिरी बाळगणे आवश्यक असल्याचे सांगितले जात आहे. अचानक झालेल्या दरवाढीमुळे खरेदी करण्यापूर्वी विचारपूर्वक निर्णय घेण्याचा सल्ला दिला जात आहे.
